ސަރުކާރުގެ ކުންފުނިތަކުގެ ވެރިން ވަކިކޮށް، ޚާއްސަކޮށް މަގުހަދާ ކުންފުނި ރޯޑް ޑިވެލޮޕްމެންޓް ކޯޕަރޭޝަން (އާރުޑީސީ) ގެ ހުރިހާ މުވައްޒަފުން ވަކިކޮށް، ކުންފުނިތަކުގެ ވެރިންވެސް ވަކިކޮށް ހުރިހާ ކުންފުނިތައް ރިފޯމްކުރަން ރައްޔިތުންގެ މަޖްލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ގޮވާލައްވާފައިވެއެވެ.
އައްބާސް ވަނީ ކުންފުނިތަކުގެ ވެރިންނަކީ ދަޢުލަތަށް ޣައްދާރުވެފައިތިބި ބައެއްގެ ގޮތުގައި ސިފަކުރައްވާފައެވެ. ޚާއްޞަގޮތެއްގައި އާރުޑީސީއަށް ގިނަ ތުހުމަތުތަކެއްކުރައްވާ އެތަނުގެ ހުރިހާ މުވައްޒަފުން ވަޒީފާއިން ވަކިކުރުމަށްވެސް އައްބާސް ވަނީ ގޮވާލައްވާފައެވެ.
އައްބާސްގެ މި ތުހުމަތުތަކާއި، ގުޅިގެން ”އެކިއެމްވީ“ އިން ކުރި ސުވާލަކަށް ޖަވާބު ދެއްވަމުން އާރުޑީސީގެ މީޑިއާ އޮފިޝަލް އަހުމަދު ފައިރޫޒް ވިދާޅުވީ އާރުޑީސީގެ އެއްވެސް މުވައްޒަފަކު، ސަރުކާރުގެ އެއްވެސް މަޝްރޫޢުއެއްގެ މަސައްކަތް ލަސްކުރުމަށް ގަސްތުގައި އެއްވެސް ކަމެއް ނުކުރާނެ ކަމަށެވެ.
”ކޮންމެ ބޭފުޅަކު ތުހުމަތު ކުރެއްވި ކަމުގައި ވިޔަސް އާރުޑީސީގެ އެއްވެސް މުވައްޒަފެއް، އެއްވެސް ރަށެއްގައި އެއްވެސް ސައިޓެއްގައި ވެސް މަސައްކަތް ކުަރާ މުވައްޒަފެއް، އެއްވެސް މަޝްރޫޢުއެއްގެ މަސައްކަތް ލަސްކުރުމަށް ގަސްތުގައި އެއްވެސް ކަމެއް ނުކުރާނެ“ ފައިރޫޒް ވިދާޅުވިއެވެ.
އައްބާސް މަޖްލީހުގެ ޖަލްސާގައި ވާހަކަ ދައްކަވަމުން ނިމިދިޔަ އެމްޑީޕީ ސަރުކާރާއި، ހިނގަމުންމިދާ ޕީއެންސީ ސަރުކާރު ހިމަނައިގެން ފާއިތުވެދިޔަ 7 އަހަރުގެ ތެރޭގައި އައްބާސްގެ އުފަން ރަށް ވެލިދޫގެ މަގުތައް ހަދާ ނުނިމޭ މައްސަލައެވެ. މިކަމަށް ޢިޝާރާތް ކުރައްވާ އައްބާސް ވަނީ އެއީ ދަޢުލަތުން ކުރާ އިސްރާފެއްގެ ގޮތުގައި ސިފަކުރައްވާފައެވެ.
ފައިރޫޒް ވިދާޅުވީ ނ. ވެލިދޫ ވިޔަސް އެހެން ރަށެއްގައި ވިޔަސް ކުރިއަށް ގެންދާ އެއްވެސް މަޝްރޫޢުއެއް ގަސްތުގައި ލަސްކުރުމަށް އެ ކޯޕަރޭޝަނުގެ އެއްވެސް މުވައްޒަފެއް މަސައްކަތް ނުކުރާނެ ކަމުގެ ޔަޤީންކަން އަރުވާކަމަށެވެ.
