ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކެބިނެޓަށް ގެންނެވި ބަދަލުތަކާއިއެކު ސިޓީސް މިނިސްޓްރީ އުވާލި ނަމަވެސް ލޯކަލް ގަވަމެންޓް އޮތޯރިޓީ (އެލްޖީއޭ) އަށް ޤާނޫނީ އެއްވެސް ހުސްކަމެއް ނާންނާނެކަމަށް އެ އޮތޯރިޓީން ބުނެފިއެވެ.
މިކަމާ ގުޅިގެން އެލްޖީއޭއިން މިއަދު ނެރުނު ބަޔާނެއްގައި ބުނެފައިވަނީ، ސިޓީސް މިނިސްޓްރީއާއި އަތޮޅު ކައުންސިލްތައް އުވާލުމުގެ ސަބަބުން އިދާރީ ދާއިރާތައް ހިންގުމަށް ގާނޫނީ ހުސްކަމެއް ކުރިމަތިވެދާނެކަމަށް ބުނެ މީސް މީޑިއާގެ އެކި މަންސަތަކުގައި ބައެއް ފަރާތްތަކުން ދޮގު ހަބަރުތައް ފަތުރަމުންދާ ކަމަށެވެ.
އެލްޖީއޭއިން ނެރުނު ބަޔާނުގައި ބުނީ، ރަށު ކައުންސިލްތަކާއި ސިޓީ ކައުންސިލްތަކުން ފޯރުކޮށްދޭން ޖެހޭނެކަމަށް، ގާނޫނުގައި ބަޔާންކޮށްފައިވާ އެންމެހައި ހިދުމަތްތަކައް ދޭން ބޭނުންވާ އެހީތެރިކަމާއި އެއްބާރުލުން ދިނުމަކީ އެ އޮތޯރިޓީއަށް ގާނޫނުން ލާޒިމްކޮށްފައިވާކަމެއް ކަމަށެވެ. އަތޮޅު ކައުންސިލްތައް އުވާލުމަށް، ލާމަޒުކަޒީ ގާނޫނަށް ގެނައި އިސްލާހުގައިވާ ގޮތުން އަތޮޅު ކައުންސިލްތައް އުވާލުމާއިއެކު އެ ކައުންސިލްތަކުގެ ދަށުގައި ހުރި ހުރިހާ މުދަލާއި ވަސީލަތްތައް އެލްޖީއޭގެ ދަށަށް ބަދަލުކޮށްފައިވާކަން ވެސް އެ އޮތޯރިޓީން ވަނީ ފާހަގަކޮށްފައެވެ.
އެލްޖީއޭއިން ބުނީ، އަތޮޅު ކައުންސިލްތައް އުވާލި ދާއިރާތަކުގައި އެލްޖީއޭގެ އޮފީސްތަކެއް ގާއިމްކުރަން އެ އިސްލާހުން އިހުތިޔާރު ދީފައިވާ ކަމަށެވެ. ކަން މިހެން ހުރުމާއެކު އަތޮޅު ކައުންސިލްތަކާއި ސިޓީސް މިނިސްޓްރީ އުވާލި ނަމަވެސް އެލްޖީއޭއަށް ހުސްކަމެއް އަންނާނެ ކަމަށް ނުދެކޭކަމަށް އެލްޖީއޭއިން ވަނީ ބުނެފައެވެ.
ފާހަގަކޮށްލެވޭ ގޮތުގައި، ރައީސުލްޖުމްހޫރިއްޔާ ޑރ، މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށް ފަހު، ސިޓީސް މިނިސްޓްރީގެ ނަމުގައި އާ މިނިސްޓްރީއެއް އުފެއްދެވުމުގެ ކުރިން، އެލްޖީއޭއާ ގުޅޭ ގޮތުން ރައްޔިތުންގެ މަޖިލީހަށް ޖަވާބުދާރީ ވެވަޑައިގަންނަވާ މިނިސްޓަރަކީ ހޯމް މިނިސްޓަރެވެ. ނަމަވެސް ސިޓީސް މިނިސްޓްރީ އުފެއްދުމަށް ފަހު އެ މެންޑޭޓް ބަދަލުކުރެއްވީ އެ މިނިސްޓްރީގެ ދަށަށެވެ.
