މިހާރު ހުސްވެފައި ހުރި ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި އިލެކްޝަނަށް އޮފިޝަލުން ހޯދަން އިލެކްޝަންސް ކޮމިޝަނުން އިއުލާނުކޮށްފިއެވެ.
އަންނަ ޖޫން މަހުގެ ހަވަނަ ދުވަހު ބޭއްވުމަށް ހަމަޖެހިފައިވާ މި އިންތިހާބާ ގުޅިގެން އިލެކްޝަންސް ކޮމިޝަނުން ބުނެފައިވަނީ، ވޯޓުލާ މަރުކަޒުތަކުގެ އޮފިޝަލުންގެ ގޮތުގައި ހަރަކާތްތެރިވުމަށް ޝައުގުވެރިވާ ފަރާތްތަކުން، އެ ކޮމިޝަންގެ އޮންލައިން ޕޯޓަލް މެދުވެރިކޮށް އޮފިޝަލަކަށްވުމަށް އެދި ހުށަހެޅޭނެ ކަމަށެވެ.
އިލެކްޝަންސް ކޮމިޝަނުން ވަނީ އޮފިޝަލުންނަށް އުޖޫރައެއް ދިނުމަށް ވެސް ނިންމައިފައެވެ. އެގޮތުން ވޯޓުލާ މަރުކަޒުގެ ވެރިޔާއަށް 2،200 ރުފިޔާގެ އުޖޫރައެއް ދިނުމަށް ނިންމާފައިވާއިރު ވެރިޔާގެ އެހީތެރިންނަށް 1،900 ރުފިޔާ، އޮފިޝަލުންނަށް 1،800 ރުފިޔާ، އަދި ރިޒާވް އޮފިޝަލުންނަށް 1،000 ރުފިޔާގެ އުޖޫރައެއް ދިނުމަށް އެ ކޮމިޝަނުން ވަނީ ނިންމާފައެވެ.
މީގެ އިތުރުން އޮފިޝަލަކަށްވުމަށް އެދި ހުށައަޅާއިރު އެ ފަރާތެއްގެ ހުންނަންޖެހޭ ޝަރުތުތައް ވެސް އީސީއިން ވަނީ ކަނޑައަޅައިފައެވެ. އެގޮތުން ހުންނަންޖެހޭ ޝަރުތުތަކަކީ:
- 18 އަހަރު ފުރިފައިވުން.
- ސިޔާސީ ޕާޓީއެއްގެ އިސްމަގާމެއް އަދާކުރާ މީހަކަށް ނުވުން.
- އެއްވެސް ކެންޑިޑޭޓެއްގެ ސިޔާސީ ކެންޕޭނު ހަރަކާތެއްގައި ބައިވެރިވާ މީހަކަށް ނުވުން.
- އިންތިހާބުގައި ބައިވެރިވާ ކެނޑިޑޭޓެއްގެ އާއިލާ މީހަކަށް ނުވުން.
- ކެނޑިޑޭޓެއްގެ މަންދޫބެއް، އޮބުޒާވަރެއް އަދި މޮނިޓަރެއް ކަމުގައި ނުވުން.
- ޖިނާއި ކުށެއްގެ ހުކުމެއް ތަންފީޒުކުރާ މީހެއް ކަމުގައި ނުވުން.
އިލެކްޝަންސް ކޮމިޝަނުން ބުނީ، އޮފިޝަލުން ތަމްރީނުކުރުމަށް ބާއްވާ ޕްރޮގްރާމް އަންނަ ޖޫން މަހުގެ 1 ވަނަ ދުވަހުން ފެށިގެން 3 ވަނަ ދުވަހަށް ކުރިއަށްދާނެ ކަމަށެވެ. އޮފިޝަލަކަށްވުމަށް އެދި ހުށަހެޅުމުގެ ސުންގަޑިއަކީ އަންނަ މެއި މަހުގެ 14 ވާ ބުރާސްފަތި ދުވަހުގެ މެންދުރުފަހު 15:00 ގެ ކުރިންނެވެ.
