ޤާނޫނުތަކާއި ޤަވާއިދުތަކާ އެއްގޮތަށް ރައްޔިތުންގެ މަޖްލީހުން ފާސްކުރި ބަޖެޓާއި ބެހޭގޮތުން މަޖްލިސް މެންބަރުން ދެކެވަޑައިގަންނަވާ ގޮތަކީ ކޮބައިތޯއޭ ކިޔާފައި، އެމްޑީޕީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅި ބަޖެޓަކީ ކުރީގެ ރައީސް އިބްރާހިމް މުހައްމަދު ސޯލިހަށް ބަވަން ޑރ. ޝަމްހީދު އިސްވެ ހުންނަވާ ލައިގެން އުޅޭ ގަރާރެއްކަމަށް ބާރަށުދާއިރާގެ މެންބަރު ޝުޖާއު ވިދާޅުވެއްޖެއެވެ.
މީގައި 2 ކަމެއް ވާކަމަށާއި، އެއްކަމަކީ ހުޅުމާލެ ދެކުނުދާއިރާގެ މެންބަރު ޑރ. ޝަމްހީދު ކުރިއަށްއޮތް ރިޔާސީ އިންތިޚާބުގައި ވާދަކުރައްވާނެ ކަމަށް އިޢުލާނުކޮށްފައިވުން ކަމަށާއި، އެމްޑީޕީން 5 މެންބަރުންގެ ކޮމިޝަނެއް ނެގިއިރުވެސް ޝަމްހީދު ހިމެނިވަޑައި ނުގަންނަވާ ކަމަށާއި، އޭސީސީއަށް ދާން ޝަމްހީދު ނިންމީވެސް އެމްޑީޕީގެ ކޮމިޝަންގައި ތިބި 5މެންބަރުންގެ މައްޗަށް ދަޢުވާ ކުރެވޭނެ ގޮތެއް އޮތްތޯ ބެލުމަށްކަމަށް ޝުޖާއު ވިދާޅުވިއެވެ. އެހެން ކަމުން މަޖްލިސްގައި ތިއްބެވި އެމްޑީޕީގެ 12 މެންބަރުން އޮޕަރޭޓް ކުރަމުންދަނީ އެފަދަ ގޮތަކަށް ކަމަށް ޝުޖާއު ތުހުމަތު ކުރެއްވިއެވެ.
“ ހުށަހެޅިފައިވާ ޤަރާރަކީ އެމްޑީޕީ މެންބަރު މުހައްމަދު އިބްރާހިމް (ކުޑޫ) ލައްވާ އެމްޑީޕީގެ ކުރީގެ ރައީސް އިބޫއަށް ބަވަން ހުޅުމާލެ ދެކުނު ދާއިރާގެ މެންބަރު ޑރ. ޝަމްހީދު ހުށަހެޅުއްވި ގަރާރެއް“ ޝުޖާއު ވިދާޅުވިއެވެ.
ޝުޖާއު ވިދާޅުވީ ފެހި ޤާނޫނު އަސާސީގެ 3 ވަނަ ބާބުގައި ރައްޔިތުންގެ މަޖްލީހުގެ މެންބަރުން އަދާކުރަންޖެހޭ ޒިންމާތަކާއި މަސްއޫލިއްޔަތުތައް ވަރަށް ސާފުކޮށް ބަޔާންކޮށްފައިވާ ކަމަށެވެ. އަދި ދަޢުލަތުގެ އަހަރީ ބަޖެޓާއި ސަޕްލިމެންޓްރީ ބަޖެޓު ފާސްކޮށްދިނުމަކީ މަޖްލީހުގެ މެންބަރުންގެ ޤާނޫނީ ޒިންމާއެއްކަން ފާހަގަކުރައްވާ ޝުޖާއު ވިދާޅުވީ 20 ވަނަ ރައްޔިތުންގެ މަޖްލީހުގައި ހުށަހެޅުނު އެއްވެސް ބަޖެޓަކަށް، އެ ގަރާރު ހުށަހެޅުއްވި އެމްޑީޕީ މެންބަރު މުޙައްމަދު އިބްރާހިމް ދުވަހަކުވެސް ވޯޓު ދެއްވާފައިނުވާ ކަމަށެވެ.
މީގެެއިތުރުން ޝުޖާއު ވަނީ ނިމިދިޔަ އެމްޑީޕީ ސަރުކާރުން ރާއްޖެއިން ބޭރުގެ ދަރަނިތައް ދައްކަން ހުރި ސޮވެރިން ފަންޑުގައި ހުރި 90 އިންސައްތަ ޑޮލަރު ދިވެހިރުފިޔާއަށް ހަދާ އެމްޑީޕީވެރިންގެ ގާތް ރަހުމަތްތެރިންނަށް ބަދަލުދިނުމުގެ ގޮތުން ހޭދަކޮށް ހުސްކޮށްލިގޮތް ހަނދާންކޮށްދެއްވާފައެވެ. އަދި އެމްޑީޕީ ސަރުކާރުން ސިޔާސީ ބޭނުމަށް ބަޖެޓުގައި ނުހިމެނޭ އެތައް ކަމަަކަށް ހޭދަކުރުމަށް ފަހު ސަޕްލިމެންޓަރީ ބަޖެޓު ހުށަހެޅި ކަމަށާއި، 19 ވަނަ މަޖްލީހުގެ ރައީސް އަދި އެމްޑީޕީގެ މިހާރުގެ ލީޑަރު ނަޝީދުވެސް އެ ސަޕްލިމަންޓްރީ ބަޖެޓު ސިފަކުރެއްވީ އެމްޑީޕީގެ ވައްކަމުގެ ރަސީދެއް ގޮތުގައި ކަމަށް ޝުޖާއު ވިދާޅުވިއެވެ.
ޝުޖާއު ވަނީ ނިމިދިޔަ އެމްޑީޕީ ސަރުކާރުގައި ވިދިވިދިގެން 4 އަހަރު 8 ބިލިއަން ރުފިޔާގެ ފައިސާ ޗާޕުކޮށް ޤައުމުގެ އިޤްތިޞާދު ވައްޓާލި ފުން އަނދަވަޅުގެ ވާހަކަ ތަފްސީލުކޮށް ކިޔައިދެއްވާފައެވެ. މިއާއިއެކު ޝުޖާއު ވިދާޅުވީ އެހެންކަމުން ހުށަހެޅިފައިވާ ޤަރާރަކީ އެމްޑީޕީ މެންބަރު މުހައްމަދު އިބްރާހިމް (ކުޑޫ) ލައްވާ އެމްޑީޕީގެ ކުރީގެ ރައީސް އިބޫއަށް ބަވަން ޑރ. ޝަމްހީދު ހުށަހެޅުއްވި ގަރާރެއް ކަމަށެވެ.
ޝުޖާއު ވިދާޅުވީ ދަޢުލަތުގެ ބަޖެޓުން އުސޫލާއި ޚިލާފަށް އެއްވެސް މިންވަރެއް ހޭދަކޮށްފައިނުވާނެ ކަމަށާއި، ބަޖެޓުގެ ބޭނުން ހިފަމުންދަނީ ރަނގަޅަށް ކަމަށެވެ.
