މި އަހަރުގެ ޙައްޖުގެ އަޅުކަން އަދާކުރުމަށް ސަޢޫދީ ޢަރަބިއްޔާއަށް ފުރާ ފަރާތްތަކުން ވެކްސިން ފުރިހަމަކުރުމަށް ޙައްޖު ކޯޕަރޭޝަނުން އިލްތިމާސްކޮށްފިއެވެ.
ޙައްޖުގެ އަޅުކަން އަދާކުރުމަށް ސަޢޫދީއަށް ފުރާ ފަރާތްތަކުން ކޮންމެހެން ވެސް ފުރިހަމަކުރަންޖެހޭ ވެކްސިންތަކަކީ، ނިންގޯކޯކަލް ކޮންޖުގޭޓް ވެކްސިން، އިންފްލުއެންޒާ، އަދި އޯރަލް ޕޯލިއޯ ވެކްސިނެވެ.
މިހާތަނަށް 60 މީހަކު ވެކްސިން ނުކުރާކަމުގެ ކަންބޮޑުވުން ފާޅުކުރައްވަމުން ޙައްޖު ކޯޕަރޭޝަނުގެ މެނޭޖިންގ ޑިރެކްޓަރު މުޙައްމަދު ޝަކީލް ވިދާޅުވީ، ވެކްސިން ފުރިހަމަ ނުކުރާ ފަރާތްތަކަށް ޙައްޖާއި ޢުމްރާގެ އަޅުކަން އަދާކުރުމުގެ ފުރުސަތު ސަޢޫދީ ސަރުކާރުން މިހާރު ނުދޭ ކަމަށެވެ. އެހެންކަމުން ވެކްސިން ފުރިހަމަ ނުކުރާ ފަރާތްތަކުން ވީ އެންމެ އަވަހަކަށް ވެކްސިން ފުރިހަމަކުރުމަށް ޝަކީލް އެދިލެއްވިއެވެ.
ރާއްޖެއިން މި އަހަރު ޙައްޖަށް ދާ ފުރަތަމަ ގްރޫޕް އަންނަ މެއި މަހުގެ 15 ވަނަ ދުވަހު ފުރުމަށް ހަމަޖެހިފައިވާއިރު، ހަތަރު ފްލައިޓެއްގައި ޙައްޖުވެރިން ސަޢޫދީއަށް ގެންދާކަން ފާހަގަކޮށްލެވެއެވެ.
