ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މިނިސްޓަރ އޮފް ޑިފެންސް އެންޑް ނޭޝަނަލް ސަރވިސްގެ މަޤާމަށް، ޙަސަން ރަޝީދު ޢައްޔަންކުރައްވައިފިއެވެ.
ވަޒީރަށް މަޤާމުގެ ފަތްކޮޅު ދެއްވުމަށް ބޭއްވެވި ރަސްމިއްޔާތު އޮތީ މިރޭ އިރާކޮޅުގެ ވަގުތެއްގައި، ރައީސުލްޖުމްހޫރިއްޔާގެ އޮފީހުގައެވެ. މި ރަސްމިއްޔާތުގައި ވަޒީރުންގެ މަޖިލީހުގެ މެންބަރުކަމުގެ ހުވައި ލައިދެއްވީ ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޑޮކްޓަރ މުޙައްމަދު އިބްރާހީމްއެވެ. ހުވައިކުރެއްވުމަށްފަހު، ވަޒީރުންގެ މަޖިލީހުގެ މެންބަރުންގެ ހުވައިގެ އިޤްރާރުގައި ވަޒީރު ވަނީ ސޮއިކުރައްވައިފައެވެ.
ފާހަގަކޮށްލެވޭ ގޮތުގައި، އިއްޔެގެ ވަގުތެއްގައި ވަޒީރުންގެ މަޖިލީހުގެ 10 ވަޒީރަކު ވަނީ މަގާމުން އިސްތިއުފާ ދެއްވައިފައެވެ. އެއާއިއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ކެބިނެޓަށް ބޮޑު ބަދަލެއް ގެންނަވައި ސަރުކާރުގެ އިދާރީ ހިންގުމަށް ބޮޑު ބަދަލެއް ގެންނަވައިފައެވެ. އެގޮތުން މިނިސްޓްރީތަކުގެ އަދަދު މިހާރު ވަނީ 15 އަށް މަދުކޮށްފައެވެ.
މިކަމާ ގުޅިގެން ރައީސުލްޖުމްހުރިއްޔާގެ އޮފީހުން ބުނެފައިވަނީ، އަލަށް ގެނެވުނު މި ބަދަލަކީ ރައްޔިތުންގެ ވިންދާ އެއްގޮތަށް ސަރުކާރު ހިންގެވުމަށް ރައީސް މުޢިއްޒު ގެންނަވަން ބޭނުންފުޅުވާ ހެޔޮ ބަދަލުތަކަށް ފުރުސަތު ދެއްވުމުގެގޮތުން ގެނެވުނު ބަދަލެއް ކަމަށެވެ.
