ބޭންކް އޮފް މޯލްޑިވްސް (ބީއެމްއެލް) ގެ ނަމުގައި އޮޅުވާލައިގެން ފައިސާ ހޯދުމަށް މަސައްކަތް ކުރަމުންދާތީ އެކަމަށް ސަމާލުވާން އެދިއްޖެއެވެ.

Ads by

މިކަމާއި ގުޅިގެން ދިވެހި ފުލުހުންގެ އެންޓި ސްކޭމް ސެންޓަރުން ފޭސްބުކުގައި ހިއްސާކޮށްފައިވާ ޕޯސްޓެއްގައި ބުނެފައިވަނީ، ބީއެމްއެލްގެ ނަމުގައި އެކި ފަރާތްތަކަށް ގުޅައި، އޮޅުވާލައިގެން މީހުންގެ ބޭންކިންގް މައުލޫމާތު ހޯދުމަށް އާ އުކުޅުތަކެއް ބޭނުންކުރަމުންދާ ކަމަށެވެ.

ފުލުހުން ހާމަކޮށްފައިވާ ގޮތުގައި، ސްކޭމް ހިންގާ ފަރާތްތަކުން އާންމުންނަށް ގުޅަމުންދަނީ އޮޅުވާލައިގެން ބީއެމްއެލްގެ މުވައްޒަފުނަށް ވެގެންނެވެ. ފުލުހުން ބުނީ، އާންމުންގެ އިތުބާރު ހޯދުމުގެ ގޮތުން އިނގިރޭސި ބަހުން ފަރިތަކަމާއިއެކު ސްކޭމްކުރާ ފަރާތްތަކުން ވާހަކަދައްކާކަން ފާހަގަކުރެވިފައިވާ ކަމަށެވެ.

މީގެ އިތުރުން، ބޭންކުގެ ރަސްމީ އީމެއިލް އެޑްރެސްތަކާ ވައްތަރު ގޮތްގޮތަށް ހުންނަ ޖީމެއިލް އެކައުންޓްތައް ބޭނުންކޮށްގެން ސްކޭމްކުރާ ފަރާތްތަކުން މުއާމަލާތްކުރަމުންދާކަން ފާހަގަކުރެވިފައިވާކަމަށް ވެސް ފުލުހުން ވަނީ ބުނެފައެވެ.

މިފަދަ ސްކޭމްތައް ހިންގާ ފަރާތްތަކުން ބޭނުންކުރާ ބައެއް އުކުޅުތަކަކީ:

• އެކައުންޓަށް މައްސަލައެއް ދިމާވެފައިވާ ކަމަށް ބުނުން.
• ވަރަށް އަވަހަށް މައުލޫމާތު ”ވެރިފައި“ ކުރަންޖެހޭ ކަމަށް ބުނެ ބިރުދެއްކުން.
• މައުލޫމާތު ނުދީފިނަމަ އެކައުންޓް ބްލޮކްވާނެ ކަމަށް ބުނެ އަވަސްއަރުވާލައިގެން ކަންކަން ކުރުވަން އުޅުން.

މި މައްސަލައާ ގުޅިގެން ބޭންކުތަކުން އެއްވެސް ހާލަތެއްގައި ޖީމެއިލް މެދުވެރިކޮށް މުއާމަލާތް ނުކުރާނެ ކަމަށާއި، އަދި އޯޓީޕީ ނުވަތަ އެކައުންޓުގެ ޕިން ނަންބަރު ފަދަ ސިއްރު މައުލޫމާތު ހޯދުމަށް ނުގުޅާނެކަން ފުލުހުންގެ އެންޓި ސްކޭމް ސެންޓަރުން ވަނީ ހަނދާންކޮށްދީފައެވެ. މީގެ އިތުރުން މީހަކު އިނގިރޭސިބަހުން ވާހަކަދެއްކުމަކީ ބޭންކުގެ ރަސްމީ މުވައްޒަފެއްކަން ކަށަވަރުވާނެ ކަމެއްނޫން ކަމަށް ވެސް ފުލުހުން ކަމަށް ވެސް ފުލުހުން ބުންޏެވެ.

ރައްކާތެރިވުމުގެ ގޮތުން އެޅިދާނެ ބައެއް ފިޔަވަޅުތައް:

• ޝައްކުކުރެވޭ ފޯނު ކޯލެއް އަތުވެއްޖެނަމަ ވަގުތުން ފޯނު ކަނޑާލުން.
• އެއްވެސް މީހަކަށް ބޭންކިންގް މައުލޫމާތު ނުދިނުން.
• މައުލޫމާތު ސާފުކުރުމަށް ބޭންކުގެ ރަސްމީ ނަންބަރުތަކަށް ގުޅުން.
• ސްކޭމްގެ މައްސަލަތައް ލަސްނުކޮށް އެންޓި ސްކޭމް ސެންޓަރަށް ރިޕޯޓްކުރުން.

މިފަދަ ކަންކަމުގައި ހޭލުންތެރިވެ، އަމިއްލަ މުދަލާއި ފައިސާ ރައްކާތެރިކުރުމަށް ހާއްސަ ސަމާލުކަމެއް ދިނުމަށް ފުލުހުން ވަނީ އިލްތިމާސްކޮށްފައެވެ.