މާލެއިން ދެކުނުގެ ރަށެއްގައި ގްރޭޑު 11 ގައި ކިޔަވަމުންދާ އުމުރުން 17 އަހަރުގެ އަންހެން ކުއްޖަކު ބަލިވެއިން މައްސަލައެއް ފެންމަތިވެ މައްސަލަ ބަލަން ފަށައިފިއެވެ.
މި ކުއްޖާގެ ބަނޑަށް މިހާރު 8 މަސްވެފައިވާ ކަމަށާއި، މިދިޔަ ހަފުތާގައިވެސް ސްކޫލަށް ދިޔަކަމަށް އެރަށުން މީހަކު މައުލޫމާތު ދީފައިވެއެވެ. މި މައްސަލަ މިހާރު ވަނީ ޖެންޑާ މިނިސްޓްރީއަށާއި، ފުލުހުންނަށް އަދި އެޑިއުކޭޝަން މިނިސްޓްރީއަށް ރަސްމީކޮށް ރިޕޯޓުކޮށްފައެވެ.
މިކަމާއި ގުޅިގެން ”އެކިއެމްވީ“ އިން ކުރި ސުވާލަކަށް ޖަވާބު ދެއްވަމުން ފުލުހުން ބުނީ ދެކުނުގެ ރަށެއްގައި، ޑޮކްޓަރ އަށް ދެއްކި 17 އަހަރުގެ ކުއްޖަކު ބަލިވެ އިން މައްސަލަ އެއް 2026 އޭޕްރީލް 13 ވަނަ ދުވަހު ފުލުހުންނަށް ހުށަހަޅާފައިވާކަމަށެވެ. އަދި މި މައްސަލަ، ކަމާ ގުޅުންހުރި އެހެނިހެން އިދާރާތަކާ ގުޅިގެން ފުލުހުން ގެންދަނީ ތަހުގީގު ކުރަމުން ކަމަށް ބުނެފައިވެއެވެ.
ދިވެހިރާއްޖޭގެ ޤާނޫނުތަކުގެ ދަށުން 18 އަހަރުން ދަށުގެ ކުއްޖަކާއެކު ޖިންސީ އަމަލެއް ހިންގުމަކީ ކުށެކެވެ. އަދި މިފަދަ ހާލަތެއްގައި ކުއްޖާގެ ސިއްޙީ އަދި ނަފްސާނީ ރައްކާތެރިކަން ކަށަވަރުކުރުމަކީ ދައުލަތުގެ ޒިންމާއެކެވެ.
