ސުނާމީ ބިނާ މައިޒާން މަރާމާތުކޮށް ޒަމާނީ ފެންވަރަކަށް ތަރައްގީކުރުމުގެ މަސައްކަތް އެއްކޮށް ނިންމާލައި ބޮޑެތި ބަދަލުތަކަކާއެކު އެ ސަރަހައްދު އަލުން އާންމުންނަށް ހުޅުވާލައިފިއެވެ.
ސުނާމީ ބިނާ މައިޒާން މަރާމާތުކޮށް ޒަމާނީ ފެންވަރަކަށް ތަރައްގީކުރުމުގެ އަމަލީ މަސައްކަތް ފަށާފައިވަނީ މިދިޔަ ފެބުރުވަރީ މަހުގެ ތެރޭގައެވެ. މި މަޝްރޫއަކީ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާއި ހަވާލުކޮށްގެން ސަރުކާރުން ކުރިއަށް ގެންގޮސްފައިވާ މަޝްރޫއެކެވެ.
ސުނާމީ ބިނާ މައިޒާން މަރާމާތުކޮށް ޒަމާނީ ފެންވަރަކަށް ތަރައްޤީކުރުމުގެ މަސައްކަތުގެ ދަށުން އެ 75 މީޓަރުގެ ސަރަހައްދެއްގައި އަލުން ޝީޓް ޕައިލް ޖަހައި، ކީވޯލް މަރާމާތުކުރުމުގެ އިތުރުން ކުޑަކުދިންނާއި އާންމުންގެ ރައްކާތެރިކަމަށްޓަކައި ފެންސްވެސް ވަނީ ޖަހައިފައެވެ. މީގެ އިތުރުން ސުނާމީ ބިނާ މޮނިއުމަންޓް އެ މައިޒާނުގެ އެހެން ސަރަހައްދަކަށް ބަދަލުކޮށް، ޕާކުގެ ތެރޭގައި ހިނގާބިނގާވެ އުޅުމަށް ވޯކްވޭތައް ހަދައި، ގިނަ އަދަދެއްގެ ގަސް އިންދައި، އިށީނދެލައިގެން ތިބޭނެ ބެންޗުތައް ވެސް ވަނީ ގާއިމުކޮށްފައެވެ.
ފާހަގަކޮށްލެވޭ ގޮތުގައި މާލޭ ސިޓީގައި ދިރިއުޅޭ ރައްޔިތުން ހިތްފަސޭހަކޮށްލުމަށް ބޭނުންކުރާ ސަރަހައްދުތައް ޒަމާނީ ފެންވަރަކަށް ތަރައްޤީކުރުމުގެ މަސައްކަތުގެ ދަށުން، ސަލްޓަން ޕާކާއި ޖުމްހޫރީ މައިދާނުގެ އިތުރުން ރަސްފަންނު ސަރަޙައްދު މަރާމާތުކުރުމުގެ މަސައްކަތް ވެސް އަންނަނީ ކުރެވެމުންނެވެ.
