މާލޭ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމުގެ ގޮތުން ސަރުކާރުން ފަށާފައިވާ ގިރާވަރު ފަޅުން ބިން ހިއްކުމުގެ މަޝްރޫއުގެ ދަށުން މިހާތަނަށް 98 ހެކްޓަރުގެ ބިން ހިއްކައި ނިމިފައިވާކަމަށް ހައުސިންގ މިނިސްޓަރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިނިސްޓަރު މުއްޠަލިބް މި މޭރުމުން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. މިނިސްޓަރު ވިދާޅުވީ، ނިމިދިޔަ އެމްޑީޕީ ސަރުކާރު ނިމުނުއިރު ގިރާވަރު ފަޅުން 54 ހެކްޓަރުގެ ބިން ހިއްކާފައިވާ ކަމަށާއި، ނަމަވެސް މުޅި މަޝްރޫއު އެއްކޮށް ނުނިމި މަސައްކަތް ހުއްޓިފައި އޮތުމުގެ ސަބަބުން މި ސަރުކާރުން މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ހަވާލުކޮށްގެން މި މަޝްރޫއު ކުރިއަށްގެންދިޔަ ކަމަށެވެ.
ގިރާވަރު ފަޅު ބިން ހިއްކުމުގެ މަސައްކަތް އެމްއޭސީއެލްއާއި ހަވާލުކޮށްފައިވަނީ މި އަހަރުގެ ޖަނަވަރީ މަހުގެ 31 ވަނަ ދުވަހުއެވެ.
މި މަޝްރޫއުގެ ދަށުން އެމްއޭސީއެލްއާއި ހަވާލުކޮށްގެން ޖުމުލަ 97 ހެކްޓަރުގެ ބިން ހިއްކުމަށް ހަމަޖެހިފައިވާއިރު، އޭގެ ތެރެއިން އެ ކުންފުނިން ހިއްކާފައިވަނީ 44 ހެކްޓަރުގެ ބިމެވެ. އެހެންކަމުން އެމްޑީޕީ ސަރުކާރުން ހިއްކާފައިވާ ސަރަހައްދާއިއެކު ޖުމުލަ 98 ހެކްޓަރުގެ ބިން ހިއްކައި ނިންމާފައިވާކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު މުއްޠަލިބް ވަނީ، މި މަސައްކަތް ކުރިއަށް އޮތް މެއި މަހުގެ ނިޔަލަށް އެއްކޮށް ނިންމާލެވޭނެކަމަށް ލަފާކޮށްފައެވެ.
ފާހަގަކޮށްލެވޭ ގޮތުގައި އެމްއޭސީއެލްއިން އަންނަނީ މާލޭ ސަރަހައްދުގެ އިތުރުން އަތޮޅުތެރޭގެ ރަށްރަށުގައި ވެސް ބިން ހިއްކުމުގެ މަސައްކަތްތައް ހަލުވި ދުވެލީގައި ކުރިއަށްގެންދަމުންނެވެ. އެގޮތުން މާލޭ ސަރަޙައްދަށް ބަލައިލާއިރު ހުޅުމާލޭ ތިންވަނަ ފިޔަވައްސާއި ރަސްމާލެ ހިމެނެއެވެެ.
