މާލޭގެ ހެންވޭރުގައި ހުރި ގެއެއްގެ ތެރޭގައި ރަހުމު ކުޑަގޮތަކަށް މާރާލާފައިވާ ޝިޢާއު މުޙައްމަދު ސަޢީދުގެ މަރުގެ މައްސަލައިގައި ތުހުމަތު ކުރެވޭ ޢަލީ ސާހިލްގެ މައްޗަށް ކުރި ދައުވާތަކުގެ ތެރެއިން 2 ދައުވާއެއް ސާބިތުވެފައިވާ ކަމަށް ކްރިމިނަލް ކޯޓުން ހުކުމްކޮށްފިއެވެ. އޭނާގެ މައްޗަށް ދައުލަތުން ޖުމްލަ 5 ދައުވާއެއް ކުރެއެވެ.
ހާދިސާ ހިނގީ 2022 ވަނަ އަހަރުގެ އޯގަސްޓު މަހުގެ ތެރޭގައިއެވެ. ހ.ޝީރީންވިލާގައި ރަހުމުކުޑަ ގޮތަކަށް މަރާލާފައި އޮތްވާ ފެނުނު ޝިޢާއު މުޙައްމަދު ސަޢީދުގެ މަރުގެ މައްސަލާގައި، ތުހުމަތުކުރެވޭ ޢަލީ ޝާހިލް ފުލުހުން ހައްޔަރު ކުރީވެސް ސީދާ ކުށުގެ ވެށިންނެވެ. މަރާލުމަށްފަހު ޝިޢާއުގެ ހަށިގަނޑު ކޮށާލާފައި އޮއްވައި ފެނުނުއިރު ފުލުހުން ވިދާޅުވި ގޮތުގައި އޭރު އެތަނުން ސާހިލް އެކަމަށް ބޭނުންކުރި އާލާތްތައް ވެސް ވަނީ ފެނިފައިވެއެވެ.
މިމައްސަލައިގެ ހައްސާސްކަމުން ކޯޓު އަޑުއެހުންތައް ގެންގޮސްފައިވަނީ ސިއްރުކޮށްގެންނެވެ. އަދި މިމައްސަލާގައި ދައުވާތައްވެސް ވަނީ ސިއްރުކޮށްފައެވެ. މިކަމާއި ގުޅިގެން ޕީޖީން ބުނީ، ސާހިލްގެ މައްޗަށް ކުރި ދައުވާތަކުގެ ތެރެއިން މިހާތަނަށް ދެ ދައުވާއެއް ސާބިތުވެފައިވާ ކަމަށާއި، އޭނާގެ މައްޗަށް ސާބިތުވެފައިވަނީ، މަސްތުވާތަކެތީގެ ބާވަތެއް ކަމަށްވާ ކެނެބިސް ބޭނުން ކުރުމުގެ ދައުވާއާއި އޮރިޔާން ކާޑު ގެންގުޅުމުގެ ދައުވާ ކަމަށެވެ.
މީގެ ތެރެއިން ކެނެބިސް ބޭނުން ކުރުމުގެ ދައުވާ ޝާހިލްގެ މައްޗަށް ދައުވާ ކުރުމުން 3 އަހަރުގެ ހުކުމެއް ވަނީ ކޮށްފައެވެ. އަދި އޮރިޔާން ކާޑު ގެންގުޅުމުގެ މައްސަލަ ސާބިތު ވުމާއި ގުޅިގެން 1 މަހާއި 6 ދުވަހުގެ ޖަލު ހުކުމެއް އޭނާގެ މައްޗަށް ވަނީ އައިސްފައެވެ.
މައުލޫމާތު ލިބިފައިވާ ގޮތުގައި ޝާހިލްގެ މައްޗަށް 5 ދައުވާއެއް ކުރެއެވެ. އޭގެ ތެރެއިން މިހާތަނަށް ހުކުމް ނުކޮށް ހުރި ދައުވާތައް ކޯޓުގައި ކުރިއަށްދާނެ ކަމަށް ޕީޖީ އޮފީހުން ވަނީ ވިދާޅުވެފައެވެ. ނަމަވެސް އެކަމުގެ ތަފްސީލެއް ހާމަކޮށްފައެއް ނުވެއެވެ.
މިމައްސަލައިގެ އިތުރު އަޑުއެހުންތަކެއް މިމަހުގެ ފަހުކޮޅު ބާއްވާނެއެވެ.
