މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑރ. ޢަލީ ޙައިދަރު އަޙްމަދު ރުހުން ނެތް ކަމަށް ފާސްކޮށްފިއެވެ.
ރައްޔިތުންގެ މަޖިލީހުގައި ދެންމެ ނެގި ވޯޓުން ރުހުން ނުދޭން މަޖިލިހުން ފާސްވީ 46 މެމްބަރުންގެ އަޣުލަބިއްޔަތުންނެވެ. ހައިދަރަށް ރުހުން ދޭން ފެނުނީ 24 މެމްބަރުންނަށެވެ.
3 ވަޒީރަކަށް ރުހުން ނެތް ކަމަށް ފާސްކުރިއިރު އެންމެ ބޮޑު ތަފާތަކުން ރުހުން ނެތް ކަމަށް ފާސްކުރީ ހައިދަރުގެ ނަމެވެ.
ހައިދަރަށް ރުހުން ނުދިނުމާ ގުޅިފައިވަނީ މާލޭ ރައްޔިތުންނަށް ކުރީ ސަރުކާރުން ދީފައިވާ ފްލެޓުތަކާއި ގޯތިތައް ނުދީ ލަސްކުރާ ކަމަށް ކުރާ ތުހުމަތުތަކެވެ.
ރައީސް ޑރ. މުހައްމަދު މުއިއްޒުގެ ކެބިނެޓް ގައި ހިމެނޭ 22 ވަޒީރުންނަށް ރުހުން ދިނުމާމެދު ފެންނަ ގޮތެއް ނިންމުމަށް މަޖިލީހުގައި މިއަދު ނެގުނު ވޯޓް ގައި 3 ވަޒީރުން ފިޔަވާ އެހެން ހުރިހާ ވަޒީރުންނަށް ރުހުން ދޭން ވަނީ ފާސްކޮށްފައެވެ.
