އެމެރިކާ އަދި އިޒްރޭލުން އީރާނަށް ދިން ހަމަލާތަކުން ލިބިފައިވާ ގެއްލުން ތަކުގެ އަންދާސީ ޢަދަދަކީ 270 ބިލިޔަން އެމެރިކާ ޑޮލަރުކަމަށް އީރާނުން ބުނެފިއެވެ. އީރާނުން ކުރިންވެސް ބުނެފައިވާ ފަދައިން ހަނގުރާމައިގެ ސަބަބުން ލިބުނު ގެއްލުންތަކުގެ ބަދަލު އެމެރިކާގެ ކިބައިން ހޯދުމަކީ ހަނގުރާމަ ހުއްޓާލުމަށް އެމީހުން ކުރަމުންދާ ޝަރުތެކެވެ.
ލިބިފައިވާ ގެއްލުންތަކުގެ އަންދާސީ އަގު އިތުރުވުން އެކަށީގެންވާ ކަމަށް ބުނެ އީރާނު ސަރުކާރުގެ ތަރުޖަމާނު ފާތިމާ މޮހަޖެރާނީ ރަޝިޔާގެ ނޫހަކަށް ބުނެފައިވަނީ “އިސްލާމްއާބާދުގައި ދެއްކި ވާހަކަތަކުގައިވެސް އަދި މިހާރުވެސް އަހަރެމެންގެ ނެގޯޝިއޭޝަން ޓީމުން މަސައްކަތްކުރަމުންދަނީ ހަނގުރާމައިގައި ލިބުނު ގެއްލުންތަކުގެ ބަދަލު ދިނުމާއިމެދު” އެވެ.
އިސްލާމްއާބާދުގައި ދިޔަ ބައްދަލުވުންތައް ވަކިކޮޅެއްގައި ނުޖެހި ނިމިފައިވާއިރު އެމެރިކާގެ ރައީސް ޑޮނަލްޑު ޓުރަމްޕު ވަނީ އީރާނުގެ އޮފިޝަލުން އައު އެއްބަސްވުމަކަށް އައުމަށް އެދި ގުޅާފައިވާ ކަމަށެވެ. މިއާއެކު އެމެރިކާ އަދި އީރާނުގެ އައު ސުލްހައިގެ ބައްދަލުވުންތަކެއް ޕާކިސްތާނުގެ ވެރިރަށް އިސްލާމްއާބާދުގައި ކުރިއަށް ދާނެކަމަށް ރޮއިޓާސް ނޫހުން ވަނީ ރިޕޯޓުކޮށްފައެވެ.
