2023 ވަނަ އަހަރުގެ އޮކްޓޯބަރު މަހުގައި ފެށިގެންދިޔަ ޣައްޒާ ހަނގުރާމަ މަޑުނުޖެހި ކުރިއަށް ދިއުމުގެ ސަބަބުން އޭގެ އަސަރުތައް ފެންނަތާ އެތައް މަހެއް ވެއްޖެއެވެ. އިޒްރޭލުން ޣައްޒާގެ އާއްމުން އެއްވާ ތަންތަނާއި މާރުކޭޓުތަކަށް އަނިޔާވެރި ގޮތަކަށް ބޮންއެޅުމެވެ. ހޮސްޕިޓަލުތަކާއި ކޮލެޖުތައް ބޭނުން ނުކުރެވޭ ވަރަށް ހަލާކުކޮށްލައި، ފެނާއި ކަރަންޓާއި އެހެނިހެން ތަކެއްޗަށް އުނދަގޫވާ ފަދަ އިންސާނީ ކާރިސާއެކެވެ.
ޣައްޒާއަށް ވަންނަ ކާބޯތަކެއްޗާއި އެހީތެރިކަމަށް އިޒްރޭލުން ހުރަސްއަޅަމުން ގެންދިއުމުގެ ސަބަބުން ރޮއްޓާއި، ކާން ބޭނުންވާ ޒަރޫރީ ތަކެތި ނުލިބި ޣައްޒާގެ މުސްލިމުން ވަނީ ބަނޑަށްޖެހިފައެވެ. ފަލަޞްޠީނުގެ ނޫސްވެރިން ފާހަގަކޮށްފައިވާ ގޮތުގައި ފާއިތުވެދިޔަ ދުވަސްތަކުގައި، ރޮށި ބޮނޑި ފަދަ ޢާއްމުކޮށް ކެޔުމަށް ބޭނުންވާ ތަކެތި ހޯދުމަށްވެސް ވަނީ ޣައްޒާގައި ހިންގާ މަދު ބޭކަރީ ތަކުގެ ކައިރީގައި އެތައް ގަޑިއިރަކު މަޑުކުރަން ޖެހިފައެވެ.
ހިލޭ އެހީދޭ ޖަމްޢިއްޔާތަކުން ބަހާ ޕާރުސަލުތައް މަދުވެ ގިނަބަޔަކަށް ނުލިބޭއިރު، ޣައްޒާގެ ރައްޔިތުން ބުނާ ގޮތުގައި ތަރުކާރީގެ އަގު އަރައިގެން ގޮސް، ކުކުޅާއި، މަހާއި، ބިސް ފަދަ ތަކެތި ވަނީ މުޅިންހެން މާރުކޭޓުން ހުސްވެފައެވެ.
މީގެ ހަ މަސް ކުރިން އިޒްރޭލުން އެއްބަސްވެފައިވާ ހަނގުރާމަ މަޑުޖައްސާލުމުގެ އެއްބަސްވުމެއްގައި ޣައްޒާ ފޯރުކޮށްދޭ އިންސާނީ އެހީތެރިކަމަށް ހުރަސް ނޭޅުމަށް އެއްބަސްވި ނަމަވެސް، އަލުން އިޒްރޭލުން ވަނީ ހުރަސްއެޅުމަށް ފަށާފައެވެ. މީގެ ސަބަބުން އަލިފްދާލުގެ ‘ވޯލްޑު ހެލްތު ޕްރޮގްރާމް’ ފަދަ ހިލޭއެހީދޭ ޖަމްޢިއްޔާތަކުގެ މަސައްކަތްތައް ވެސް ވަނީ މަޑުޖެހި، ހުއްޓުމަކަށް އައިސްފައެވެ.
އާދިއްތަ ދުވަހު ޣައްޒާ ސަރުކާރުގެ އޮފީހުން ނެރެފައިވާ ބަޔާނެއްގައި ބުނެފައިވާ ގޮތުގައި އިޒްރޭލުން ދަނީ “އިންޖިނިއާޑް (އަމިއްލައަށް އުފައްދާފައިވާ) ސްޓާވޭޝަން” ފުޅާކުރަމުންނެވެ. އެބަޔާނުގައި އިތުރަށް ބުނެފައިވާ ގޮތުގައި އިޒްރޭލުން އަޅަމުން ގެންދާ އުނދަގޫކުރުމުގެ ފިޔަވަޅުތަކަކީ ގަސްތުގައި އަޅަމުންދާ “ސިސްޓަމެޓިކް” ފިޔަވަޅުތަކެކެވެ.
