އުޞޫލާ އެއްގޮތްވާ ގޮތުގެ މަތިން ކޮންމެ ހަފުތާއަކު ވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޫސްވެރިންނާ ބައްދަލުކުރައްވާނެކަމަށް ރައީސުލްޖުމްހޫރިއްޔާގެ އޮފީހުގެ ޗީފް ސްޕޯކްސް ޕާސަން ހީނާ ވަލީދު ވިދާޅުވެއްޖެއެވެ.
ހީނާ މި މޭރުމުން ވިދާޅުވީ އެކްސްގައި ޙިއްޞާކުރެއްވި ޕޯސްޓެއްގައެވެ. އެކްސްގައި ޙިއްޞާކުރެއްވި އެ ޕޯސްޓުގައި ހީނާ ވިދާޅުވީ, ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނޫސްވެރިންނާ ބައްދަލުކުރެއްވުން 1 މާރިޗް 2026 ވަނަ ދުވަހުން ފެށިގެން ކަނޑައެޅިފައިވާ އުޞޫލާ އެއްގޮތަށް ޤަވާއިދުން ކުރިއަށްދާނެ ކަމަށެވެ.
މި އަހަރުގެ ރިޔާސީ ބަޔާން އިއްވަވަމުން ވެސް ރައީސް މުޢިއްޒު މިކަން މި މަގުން ކުރިއަށްގެންދަވާނެކަމުގެ ޔަޤީންކަން ދެއްވަވާފައިވާކަން ހީނާ ވަނީ ފާހަގަކުރައްވައިފައެވެ.
ކަން މިހެން އޮތްއިރު، ކުރިއަށް އޮތް ހަފުތާތަކުގައި ނޫސްވެރިންގެ ބައްދަލުވުން ތާވަލުކުރެވޭގޮތް ހާމަކުރައްވަމުން ގެންދަވާނެކަމަށް ހީނާ ވަނީ ވިދާޅުވެފައެވެ.
