ޕާކިސްތާނުގެ ބަލުޗިސްތާނު ޕުރޮވިންސްގެ ވެރިރަށް ޤުއެޓާ ސިޓީގައި އިއްޔެ ވަނީ ކާކުކަން ނޭނގޭ ބަޔަކު ފިސްތޯލަކުން ބަޑިޖަހާ ހަޒަރާ ޝީޢީންތަކަކަށް އަމާޒުކޮށް ހަމަލާދީފައެވެ. މި ހަމަލާގައި 2 މީހަކު މަރުވެފައި ވާއިރު އިތުރު 3 މީހުންނަށް ވަނީ އެކިވަރުގެ ޒަޚަމްތައް ލިބިފައެވެ.
ބަލުޗިސްތާނު ޕުރޮވިންސްގެ ހޯމް މިނިސްޓަރު އަނިޔާ ލިބިފައިވާ މީހުންނަށް ޒިޔާރާތްކޮށް ވަނީ އެމީހުންގެ އާއިލާތަކާއި ބައްދަލުކޮށްފައެވެ. އޭނާ ހަމަލާ ކުއްވެރިކޮށް ބުނެފައިވާ ގޮތުގައި ސަރުކާރުގެ ފުރިހަމަ އެއްބާރުލުން އެމީހުންނަށް ދީ، އެކަން ހިންގި ބަޔަކު ހޯދުމަށް ސަލާމަތީ ބާރުތަކަށް ވަނީ އިރުޝާދު ދީފައެވެ.
އިސްލާމީ ހަނގުރާމަވެރި ޖަމާޢަތް އިސްލާމިކް ސްޓޭޓު (އައިއެސް) އިން އެމީހުންގެ ނޫސް މަޞްދަރުތައް މެދުވެރިކޮށް އެހަމަލާގެ ޒިންމާ ނަގާފައިވާއިރު، އެމީހުން އަފްޣާނިސްތާނު އަދި ޕާކިސްތާނު ސަރަހައްދުގައި ދިރިއުޅޭ ހަޒާރާ ޝީޢީންނަށް ވަކިން އަމާޒުކޮށް މިފަދަ ހަމަލާތައް އެކިދުވަސްވަރު މަތިން ދެމުން ގެންދެއެވެ.
