ތ. ވިލުފުށި އަދި ބ. ތުޅާދޫގައި ތަރައްޤީކޮށްފައިވާ ހައުސިންގ ޔުނިޓުތަކަށް އެދި ފޯމު ހުށަހެޅުމުގެ މުއްދަތު، ކޮންސްޓްރަކްޝަން މިނިސްޓްރީން އިތުރުކޮށްފިއެވެ.
މިކަމާ ގުޅިގެން ކޮންސްޓްރަކްޝަން މިނިސްޓްރީން ކޮށްފައިވާ އިޢުލާނެއްގައި ބުނެފައިވަނީ، ތ. ވިލުފުށީގައި ތަރައްޤީކޮށްފައިވާ 100 ހައުސިންގ ޔުނިޓާއި ބ. ތުޅާދޫގައި ތަރައްޤީކޮށްފައިވާ 100 ހައުސިންގ ޔުނިޓަށް އެދި ފޯމު ހުށަހެޅުމުގެ ފުރުޞަތު، މި މަހުގެ 30 ވާ ބުރާސްފަތި ދުވަހުގެ ރޭ 23:59 އާއި ހަމައަށް އިތުރުކޮށްފައިވާ ކަމަށެވެ.
މި ހައުސިންގ ޔުނިޓުތަކަށް އެދި ފޯމު ހުށަހަޅާނީ ކޮންސްޓްރަކްޝަން މިނިސްޓްރީގެ ”ހިޔާވެހި ޕޯޓަލް މެދުވެރިކޮށެވެ.
ފާހަގަކޮށްލެވޭ ގޮތުގައި، ވިލުފުއްޓާއި ތުޅާދޫގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯދައިދިނުމަށް މި ސަރުކާރުން އަންނަނީ ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން ގިނަ ދުވަސްތަކެއްވަންދެން ހުއްޓާލާފައި އޮތް ވިލުފުށީ ހައުސިންގ ޔުނިޓްތަކުގެ މަސައްކަތް އަލުން ފަށައި ހަލުވި ދުވެލީގައި ކުރިއަށްގެންގޮސް ނިންމާލީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މި ސަރުކާރުންނެވެ.
މީގެ އިތުރުން ވެސް ރާއްޖޭގެ އެކި ސަރަޙައްދުތަކަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ހޯދައިދިނުމުގެ ގޮތުން މި ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން، މާލެ ސަރަޙައްދުން އެކަނި ވެސް 7،900 ހައުސިންގ ޔުނިޓު ތަރައްޤީކުރުމުގެ މަސައްކަތް ފަށައި، 15،000 ގޯތި ދޫކުރުމުގެ މަސައްކަތް މިހާރު ވަނީ ފަށައިފައެވެ.
