މާލޭގެ ވަށައިގެން އޮންނަ ބޭރުތޮށި މަރާމާތުކުރުމުގެ މަސައްކަތް އަންނަ މެއި މަހުގެ ތެރޭގައި ފެށުމަށް ހަމަޖެހިފައިވާކަމަށް ކޮންސްޓްރަކްޝަން މިނިސްޓްރީން ބުނެފިއެވެ.
ޖަޕާންގެ ޓޯޔޯ ކޮންސްޓްރަކްޝަން ކޮމްޕެނީ ލިމިޓެޑާއި ޙަވާލުކޮށްގެން ކުރިއަށްގެންދާ މި މަޝްރޫޢަކީ، ދިވެހި ސަރުކާރުން ޖަޕާން ސަރުކާރުގެ އެހީތެރިކަމަށް އެދުމުން، އެ ޤައުމުން އިސްނަގައިގެން ކުރިއަށްގެންދާ މަޝްރޫޢެކެވެ. މާލޭގެ ބޭރުތޮށި މަރާމާތުކުރުމަށް ސަރުކާރުން ނިންމާފައިމިވަނީ އެ ތޮއްޓަށް އެކިވަރުގެ ގެއްލުންތައް ލިބިފައިވާތީއެވެ.
މި މަޝްރޫޢުގެ އެއްބަސްވުމުުގައި ޓޯޔޯ ކޮންސްޓްރަކްޝަން ކޮމްޕެނީ ލިމިޓެޑާއެކު ކޮންސްޓްރަކްޝަން މިނިސްޓްރީން ސޮއިކޮށްފައިވަނީ މިދިޔަ ފެބުރުއަރީ މަހުގެ 12 ވަނަ ދުވަހުއެވެ. މާލޭގެ ބޭރުތޮށި މަރާމާތުކުރުމުގެ މަޝްރޫޢުގެ ދަށުން ކުރުމަށް ހަމަޖެހިފައިވާ ބައެއް މަސައްކަތްތަކަކީ:
- ރާޅުގަނޑު ސަރަޙައްދުން ފެށިގެން ސިޓްރޯން ރެސްޓޯރަންޓާއި ހަމައަށް އޮންނަ ތޮށިގަނޑު ރީ-ޕްރޮފައިލް ކުރުން
- ސަލްމާން މިސްކިތް ހިމެނޭ ސަރަޙައްދުގެ ތޮށިގަނޑު 70 ސެންޓިމީޓަރު އުސްކޮށް، ރީ-ޕްރޮފައިލް ކުރުން
- ބޭންކް އޮފް މޯލްޑިވްސް ކުރިމަތީގައި އޮންނަ ތޮށިގަނޑު މަރާމާތުކޮށް ރީ-ޕްރޮފައިލް ކުރުން
- މާލޭގެ 16 ޕަމްޕް ސްޓޭޝަނެއް މަރުކަޒީކޮށް މޮނިޓަރ ކުރެވޭނެ ނިޒާމެއް ޤާއިމުކުރުން
މި މަޝްރޫޢު ކުރިއަށްގެންދިއުމަށް ޓޯޔޯ ކޮންސްޓްރަކްޝަން ކޮމްޕެނީ ލިމިޓެޑާއި ޙަވާލުކޮށްފައިވަނީ 700,000,000.00 ޖަޕަނީސް ޔެންއަށް، ޖުމުލަ 487 ދުވަހުގެ ތެރޭގައި ނިންމާ ގޮތަށެވެ. މި މަސައްކަތް ނިމުމާއެކު މާލެއަށް ދިމާވެފައިވާ އުދައެރުމުގެ މައްސަލައަށް ދާއިމީ ޙައްލެއް ލިބިގެންދާނެކަމަށް ކޮންސްޓްރަކްޝަން މިނިސްޓްރީން ވަނީ ބުނެފައެވެ.
މާލޭގައި މިހާރު ތަރައްޤީކޮށްފައިވާ ބޭރު ތޮއްޓަކީ ރައީސް މައުމޫންގެ ސަރުކާރުގައި 1988 ވަނަ އަހަރުން ފެށިގެން 2006 ވަނަ އަހަރާއި ހަމައަށް ހަތަރު ފިޔަވައްސަކަށް ބަހާލައިގެން ތަރައްޤީކޮށްފައިވާ ބޭރު ތޮއްޓެކެވެ.
