ނިމިދިޔަ އެމްޑީޕީ ސަރުކާރުން އެތައް މިލިއަން ރުފިޔާއެއް ޚަރަދުކޮށްގެން ތަރައްޤީކުރި އަމީނީ މަގުގެ ހުޅަނގަށްވީ ބައިގައި އެކި ތަންތަނުން ތާރުގަނޑު އުފުލި، ހަލާކުވެފައި ހުރުމުގެ ސަބަބުން އެ ސަރަޙައްދުގައި ތާރުއަޅައިގެން އަލުން ތަރައްޤީކުރުމަށް ނިންމާފައިވާކަމަށް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ބުނެފިއެވެ.
މިކަމާ ގުޅިގެން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) ގެ މެނޭޖިންގ ޑިރެކްޓަރު އިބްރާހީމް ނަޡީމް ދަޢުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން ވިދާޅުވީ، އަމީނީ މަގުގެ ޣިޔާސުއްދީން ސްކޫލުން ފެށިގެން ހުޅަނގަށް އޮންނަ ސަރަޙައްދު ވަރަށް ބޮޑަށް ހަލާކުވެ މަރާމާތުކުރަން ޖެހިފައިވާ ކަމަށެވެ. އެގޮތުން އެ ސަރަޙައްދުގެ ތާރުގަނޑު ނަގާފައި އަލުން ތާރުއެޅުމުގެ މަސައްކަތް ފެށުމަށް ހަމަޖެހިފައިވާކަން ހާމަކުރައްވަމުން ނަޡީމް ވިދާޅުވީ، ކުރިއަށް އޮތް ދެ ހަފުތާއެއްހައި ދުވަހުގެ ތެރޭގައި އެ މަސައްކަތް ފެށިގެންދާނެ ކަމަށެވެ.
”މިހާރު އެތަނުގައި އޮތް ތާރުގަނޑު ނަގާފައި އަލުން އެތަނުގައި ތާރުއެޅުމުގެ މަސައްކަތް ކުރިއަށް ގެންދާނެ، ދެން އެއީ މާލޭގައި އަޅުގަނޑުމެން އެންމެ އަވަހަށް ކުރިއަށްގެންދާނެ އެންމެ ބޮޑު މަސައްކަތް،“ – އެމްޑީ އިބްރާހީމް ނަޡީމް ވިދާޅުވިއެވެ.
ނަޡީމް ވިދާޅުވީ، އަމީނީ މަގުގައި ތާރުއަޅަައިގެން އަލުން ތަރައްޤީކުރާނީ ޓެކްނިކަލީ ބަލަންޖެހޭ ހުރިހާ ކަމެއް ބެލުމަށް ފަހުގައި ކަމަށެވެ. އެގޮތުން އަލުން ތާރުއަޅާއިރު ރަނގަޅު ފެންވަރަކަށް ތާރުއަޅާނެ ކަމަށާއި، ވަކިން ޚާއްޞަކޮށް، އެ ސަރަޙައްދުގައި ތާރުއެޅުމުގެ ކަންކަން ކުރިއަށްގެންދާއިރު ރާއްޖެއިން ބޭރުން ރޯޑް އިންޖިނިއަރެއް ގެނެސްގެން އެ މަސައްކަތް ކުރިއަށް ގެންދިޔުމަށް ނިންމާފައިވާކަމަށް ނަޡީމް ވިދާޅުވިއެވެ.
އާންމުގޮތެއްގައި ތާރުގަނޑު އެކި ތަންތަނުން އުފުލި ހަލާކުވުމަށް މެދުވެރިވަނީ ތާރުގަނޑު ނުހިކެނީސް މަގު ހުޅުވައި ބޭނުންކުރަން ފެށުމުންނެވެ. މިގޮތަށް މަގުގެ އެކި ތަންތަނުން ތާރުގަނޑު އުފުލި ހަލާކުވެފައި ހުރުމުގެ ސަބަބުން އެ މަގުގައި ދަތުރުކުރަން އުނދަގޫކަމުގެ ޝަކުވާ އާންމުން އަންނަނީ ކުރަމުންނެވެ.
