ދިވެހިރާއްޖޭގެ މައި އިދިކޮޅު ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އެޑްވައިޒަރުންގެ މަގާމަށް ކުރީގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި، ކުރީގެ ރައީސް އަދި ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު މިރޭ ހަމަޖައްސަވައިފިއެވެ.
މި ނިންމުން ނިންމާފައިވަނީ މިރޭ ބޭއްވުނު އެމްޑީޕީގެ ގައުމީމަޖިލީހުގެ ކުއްލި ޖަލްސާއެއްގައެވެ. މި ދެ ބޭފުޅުން ޕާޓީގެ އެޑްވައިޒަރުންގެ ގޮތުގައި ހަމަޖެއްސުމަށް ގައުމީ މަޖިލީހަށް ހުށަހެޅުމުން، އެ ހުށަހެޅުމަށް ޖަލްސާގައި ބައިވެރިވެވަޑައިގެންނެވި މެންބަރުންގެ ތެރެއިން 61 މެންބަރުން ވަނީ ވޯޓު ދެއްވާފައެވެ.
މިރޭގެ ޖަލްސާގައި މި ނިންމުމުގެ އިތުރުން، ޕާޓީގެ ހިންގުމަށް މުހިންމު ބަދަލެއް ގެނައުމަށްވެސް ވަނީ ފާސްކޮށްފައެވެ. އެގޮތުން، ކުރީގެ ރައީސުން ޕާޓީގެ މެންބަރުކަމުގައި ދެމިތިއްބެވިހާ ހިނދަކު، އެ ބޭފުޅުންނަކީ ޕާޓީގެ ގައުމީ މަޖިލީހުގެ މެންބަރުން ކަމުގައި ބެލުމަށް ވަނީ ނިންމާފައެވެ.
މި ބަދަލު ޕާޓީގެ އަސާސީ ގަވާއިދުގައި ހިމެނުމަށްޓަކައި ގެންނަންޖެހޭ އިސްލާހުތައް، ދެން އެންމެ އަވަހަށް ބޭއްވޭ ޕާޓީގެ ކޮންގްރެސްއަށް ހުށަހަޅައިގެން ކުރިއަށް ގެންދިއުމަށްވެސް މިރޭގެ ޖަލްސާގައި ވަނީ ކަނޑައަޅާފައެވެ.
މި ނިންމުންތަކަކީ ޕާޓީގެ ތަޖުރިބާކާރު އިސް ބޭފުޅުންގެ ލަފައާއި އިރުޝާދު ޕާޓީ ހިންގުމުގައި ހޯދުމަށާއި، ޕާޓީގެ އެތެރޭގެ ގުޅުން ވަރުގަދަކުރުމުގެ މަގްސަދުގައި ނިންމާފައިވާ ނިންމުންތަކެއް ކަމަށް އެމްޑީޕީން މައުލޫމާތުދެއެވެ.
