މިދިޔަ ހޮނިހިރު ދުވަހު ބޭއްވުނު ލޯކަލް ކައުންސިލް އިންތިޚާބުގެ ރަސްމީ ނަތީޖާ އިލެކްޝަންސް ކޮމިޝަން (އީސީ) އިން އާންމުކޮށްފިއެވެ. މި ނަތީޖާތަކުން ދައްކާގޮތުގައި، ސިޓީތައް ފިޔަވައި ރަށްރަށުގެ ކައުންސިލް ރައީސުންގެ ގޮނޑިތަކުން އެންމެ ކުރި ހޯދާފައިވަނީ ވެރިކަންކުރާ ޕީއެންސީންނެވެ.
އިލެކްޝަންސް ކޮމިޝަނުގެ ރަސްމީ ތަފާސްހިސާބުތަކަށް ބަލާއިރު، ރަށްރަށުގެ ކައުންސިލް ރައީސުންގެ ގޮނޑިތަކުގެ ތެރެއިން 74 ގޮނޑި ޕީއެންސީން ކާމިޔާބުކޮށްފައިވެއެވެ. އިދިކޮޅު އެމްޑީޕީއަށް ލިބިފައިވަނީ 71 ގޮނޑިއެވެ. މި ދެ ޕާޓީގެ މެދުގައި ހުރީ އެންމެ ތިން ގޮނޑީގެ ތަފާތެވެ.
އިތުރު ޕާޓީތަކަށް ބަލާއިރު، އަމިއްލަ ގޮތުން ވާދަކުރެއްވި 31 ކެންޑިޑޭޓަކު ގޮނޑި ކާމިޔާބު ކުރެއްވިއިރު، އެމްޑީއޭއަށް 4 ގޮނޑި، ޖުމްހޫރީ ޕާޓީއަށް 1 ގޮނޑި އަދި ދަ ޑިމޮކްރެޓްސްއަށް 1 ގޮނޑި ވަނީ ލިބިފައެވެ. އެމްޑީއޭއިން ގޮނޑިތައް ހޯދާފައިވަނީ ނ. ކުޑަފަރީ، ދ. ހުޅުދެލި، ދ. ބަނޑިދޫ އަދި ދ. މީދޫންނެވެ. ޖުމްހޫރީ ޕާޓީއަށް އދ. މާމިގިލީގެ ގޮނޑި ލިބުނުއިރު، ޑިމޮކްރެޓްސްއަށް ގޮނޑި ލިބުނީ ވ. ތިނަދޫންނެވެ.
ޕީއެންސީން އެންމެ ބޮޑު ކާމިޔާބީއެއް ހޯދާފައިވަނީ ކ. އަތޮޅާއި އއ. އަތޮޅުންނެވެ. މިއިން ކޮންމެ އަތޮޅަކުން އެ ޕާޓީން 7 ގޮނޑި ނެގިއެވެ. އެމްޑީޕީއަށް ކ. އަތޮޅުން އެއްވެސް ގޮނޑިއެއް ލިބިފައި ނުވާއިރު، އއ. އަތޮޅުން އެ ޕާޓީއަށް ލިބުނީ އިންތިޚާބަކާ ނުލައި ކަށަވަރުވި އއ. ބޮޑުފޮޅުދޫގެ ގޮނޑި އެކަންޏެވެ. ކ. އަތޮޅުގެ ދިއްފުއްޓާއި ތުލުސްދޫގެ ގޮނޑި ކާމިޔާބު ކުރެއްވީ އަމިއްލަ ކެންޑިޑޭޓުންނެވެ.
މި ނަތީޖާއާއެކު 10 އަތޮޅެއްގެ ކައުންސިލް ރައީސުންގެ މެޖޯރިޓީ ޕީއެންސީން ހޯދިއިރު، 6 އަތޮޅެއްގެ މެޖޯރިޓީ ލިބުނީ އެމްޑީޕީއަށެވެ. އެމްޑީޕީން އެންމެ ގިނަ ގޮނޑި ހޯދީ ށ. އަތޮޅާއި ރ. އަތޮޅުންނެވެ. އެއީ ކޮންމެ އަތޮޅަކުން 8 ގޮނޑިއެވެ. މީގެ އިތުރުން ހދ، ނ، އަދި މ. އަތޮޅުންވެސް އެމްޑީޕީން ވަނީ ފާހަގަކޮށްލެވޭ ނަތީޖާއެއް ހޯދާފައެވެ.
ވޯޓުގެ އިންސައްތައަށް ބަލާއިރު، ސިޓީތައް ނުހިމަނައި ޕީއެންސީން 63,297 ވޯޓު (%44.24) ހޯދިއިރު، އެމްޑީޕީއަށް ލިބުނީ 51,340 ވޯޓު (%35.80) އެވެ. އަމިއްލަ ކެންޑިޑޭޓުންނަށް 25,815 ވޯޓު (%18) ލިބިފައިވެއެވެ.
ރަށްރަށުގެ ނަތީޖާ ޕީއެންސީއަށް ބުރަވި ނަމަވެސް، ސިޓީތަކުގެ މޭޔަރުން ހޮވުމުގައި ކުރި ހޯދާފައިވަނީ އެމްޑީޕީއެވެ. ފަސް ސިޓީގެ މޭޔަރުން ހޮވުމަށް ބޭއްވި އިންތިޚާބުގައި އެމްޑީޕީން 33,311 ވޯޓު ހޯދިއިރު، ޕީއެންސީއަށް ލިބިފައިވަނީ 20,107 ވޯޓެވެ. މިއީ 13,204 ވޯޓުގެ ބޮޑު ތަފާތެކެވެ.
