އެމްޑީޕީގެ އާއްމު މެމްބަރުންގެ ބުރަ މަސައްކަތުން ހޯދި ކާމިޔާބީގެ އުފާފާޅުކުރުމަށް ބޭއްވި ޖަލްސާގައި، ޕާޓީގެ އިސް ލީޑަރުންގެ މެދުގައި އުފެދުނު ކޯޅުމުގެ ސަބަބުން މެމްބަރުންގެ ހިތުގައި ޖައްސައި، މުޅި މަންޒަރު ހަޑިކޮށްލާފައިވާ ކަމަށް ވިދާޅުވެ ރީކޯ މޫސާ މަނިކު ވަރަށް ބޮޑަށް ފާޑުވިދާޅުވެއްޖެއެވެ.
ރީކޯ މޫސަ މިކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ވިދާޅުވީ، ޕާޓީގެ އިސް ލީޑަރުންގެ މެދުގައި ހިނގި ކަންތައްތަކުގެ ސަބަބުން އެތައް ބަޔަކު މާޔޫސްވެފައިވާ ކަމަށެވެ. ލީޑަރުންނަށް އެއްބަސްވެވިއްޖެ ކަމަށް ބުނާއިރު، މިއީ ހަމައެކަނި ލީޑަރުންގެ ޕާޓީއެއްތޯ އޭނާ ސުވާލު އުފެއްދެވިއެވެ. އަދި އާއްމު މެމްބަރުންގެ ކުރިމަތީގައި ލީޑަރުން ހޭވި ހަޑިއަށް މާފަށް އެދޭނެތޯ ވެސް މޫސަ ވަނީ ސުވާލު ކުރައްވާފައެވެ.
މޫސަގެ ޕޯސްޓުގައި އިތުރަށް ފާހަގަކުރެއްވި ގޮތުގައި، އިންތިޚާބަކާ ނުލައި ކޮންމެ ރިޔާސީ ކެނޑިޑޭޓަކަށް ޕާޓީ ހިންގުމުގެ ބާރު ދެނީތޯ އާއި، އެމްޑީޕީގައި ގޮތް ނިންމާ ބަޔަކީ ހަމައެކަނި ލީޑަރުން ކަމަށް ވެފައި، އާއްމު މެމްބަރުންނަކީ އެއްދުވަހު ކަރުނަ އަޅާފައި އަނެއްދުވަހު ލީޑަރުންގެ ކަރުގައި މާފަތި އަޅުވަން ތިބޭ ބަޔަކަށް ވެގެން ނުވާނެ ކަމަށެވެ.
”2028 ގެ ކުރިން ދެން ނަގާ ރާޅެއްގައި 4 ޕާޓީއަށް ބައި ނުވެއްޖިއްޔާ ސާބަސް،“ ޕާޓީގެ ކުރިމަގާ މެދު ކަންބޮޑުވުން ފާޅުކުރެއްވި އެވެ.
މީގެ އިތުރުން، ޚުދުމުޚުތާރު އާއިލީ ވެރިކަމުން އެމްޑީޕީ ސަލާމަތް ކުރަންޖެހޭ ކަމަށް ވިދާޅުވެ މޫސަ ވިދާޅުވީ، ކުރިން ގައުމުގެ ވެރިކަން ކޮށްފައި ހުރި މީހަކު ދެވަނަ އިންތިޚާބެއްގައި ބަލިވެފައި ހުރިއްޔާ، ދެން އެމްޑީޕީގެ ޓިކެޓުގައި ވާދަނުކުރާނެ ކަމަށް އިއުލާނު ކުރުމުން ނޫނީ ލީޑަރުން އެއްބަސްވެއްޖެ ކަމަށް ގަބޫލު ނުކުރާނެ ކަމަށެވެ.
މޫސަގެ މި ފާޑުކިޔުންތައް އަމާޒުވެފައިވަނީ އެމްޑީޕީގެ އެތެރޭގެ މަސްލަހަތު ގޯސްވެ، ލީޑަޝިޕްގެ މެދުގައި ޚިޔާލުތަފާތުވުންތައް ބޮޑުވެފައިވާ ދަނޑިވަޅެއްގައެވެ.
