ކަނޑުމަގުން ރާއްޖެއަށް ހަ ކިލޯއަށްވުރެ ގިނަ އަދަދެއްގެ މަސްތުވާތަކެތި އެތެރެކުރި ކަމުގެ ތުހުމަތުގައި ހައްޔަރުކުރި ދެ ޒުވާނުންގެ ކުޑަކަމުދާ ތަކެތި މަސްތުވާތަކެއްޗަށް ޕޮޒިޓިވްވެ، އެމީހުންގެ ބަންދަށް އިތުރު 16 ދުވަސް ކޯޓުން ޖަހައިފިއެވެ.
މި މައްސަލައިގައި ފުލުހުން ހައްޔަރުކޮށްފައިވަނީ މއ. ތަރިޖެހިއާގެ، އުމުރުން 25 އަހަރުގެ ޢިސްމާއީލް އަބާން ޢަބްދުﷲ އާއި ސ. މަރަދޫ، ރަތްމާގެ، އުމުރުން 19 އަހަރުގެ އަޙްމަދު ދާން ފަރްހޫދުއެވެ. ފުލުހުން ބުނި ގޮތުގައި މި ދެ މީހުން ހައްޔަރުކޮށްފައި ވަނީ ރާއްޖެއަށް މަސްތުވާތަކެތި އެތެރެކޮށް، ބޭނުންކޮށް، ގެންގުޅެ އަދި އެ ތަކެތި ވިއްކައި ވިޔަފާރިކުރާކަމުގެ ތުހުމަތުގައެވެ.
މިދިޔަ މާރިޗު މަހުގެ ފަސްވަނަ ދުވަހު މޯލްޑިވްސް ކަސްޓަމްސް ސާވިސްއާއި ފުލުހުންގެ ޑްރަގް އެންފޯސްމަންޓް ގުޅިގެން ހިންގި ޚާއްޞަ އޮޕަރޭޝަނެއްގައި މި ދެ މީހުން ހައްޔަރުކޮށް ބަލައި ފާސްކުރިއިރު، ހަ ކިލޯއަށްވުރެ ގިނަ މަސްތުވާތަކެތި ވަނީ ފެނިފައެވެ. މިދިޔަ މަހުގެ ފަހުކޮޅުން ފެށިގެން ބަންދުގައި ތިބި މި ދެ މީހުންގެ ބަންދާމެދު ގޮތެއް ނިންމުމަށް ބުރާސްފަތި ދުވަހު ކޯޓަށް ހާޒިރުކުރުމުން، ކޯޓުން ވަނީ އެ ދެ މީހުންގެ ބަންދަށް އިތުރު 16 ދުވަސް ޖަހައިފައެވެ.
ކޯޓުން ނެރުނު ބަންދު އަމުރުން އެނގޭ ގޮތުގައި، މި ދެ ޒުވާނުންގެ ކުޑަކަމުދާ ތަކެތި ވަނީ މަސްތުވާތަކެއްޗަށް ޕޮޒިޓިވްވެފައެވެ.
ދިވެހިރާއްޖޭގެ މަސްތުވާތަކެއްޗާބެހޭ ޤާނޫނު ބުނާގޮތުން، މަސްތުވާތަކެތި ޓްރެފިކް ކުރުމަކީ ނުހަނު ބޮޑު ކުށެކެވެ. އެގޮތުން 4 ގްރާމަށްވުރެ ގިނަ ޑައިމޯފިން ނުވަތަ 14 ގްރާމަށްވުރެ ގިނަ ކެނެބިސް އަތުގައި ހުރުމަކީ ޓްރެފިކް ކުރުން ކަމަށް ބެލެވެއެވެ. މިފަދަ ކުށްތަކުގެ އަދަބަކީ އުމުރަށް ޖަލަށްލުމާއެކު (25 އަހަރު)، 100,000 ރުފިޔާއާއި 10,000,000 ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.
ޤާނޫނުގައި ކަނޑައަޅާފައިވާ ވަކި ބަރުދަނަކަށްވުރެ ގިނައިން މަސްތުވާތަކެތި މީހެއްގެ އަތުން ފެނިއްޖެނަމަ، އެ މީހަކީ އެ ތަކެތި ޓްރެފިކް ކުރާ މީހެއް ކަމަށް ޤާނޫނީ ގޮތުން ބެލެވޭނެއެވެ. މިފަދަ މައްސަލަތަކުގައި ދައުލަތުން ސާބިތުކޮށްދޭން ޖެހޭނީ އެ މީހެއްގެ އަތުގައި އެ ތަކެތި ހުރިކަމާއި، އެއީ މަސްތުވާތަކެތިކަން އެނގިހުރެ އަތުގައި ބެހެއްޓިކަމެވެ.
