އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ތެރޭގައި މިވަގުތު ހިނގަމުންދާ ހައިޖާނުގެތެރެއިން އެޕާޓީގެ ހުރިހާ ލީޑަރުން އެކުގައި މަސައްކަތް ކުރެވޭނެ ގޮތެއް ހޯދިއްޖެ ކަމަށާއި އަންނަ ރިޔާސީ އިންތިޚާބު ކާމިޔާބު ކުރުމަށް އެމްޑީޕީ ލީޑަރުން ތިބޭނީ އެކުގައި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ހާމަކުރައްވައިފިއެވެ.
އިބޫ މިފަދައިން ވިދާޅުވީ އިބޫގެ އުފަން ރަށް ޅ. ހިންނަވަރަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން، އެރަށުގެ އެމްޑީޕީ މެންބަރުންނާއި ވާހަކަ ދައްކަވަމުންނެވެ. އިބޫ ވިދާޅުވީ، އެމްޑީޕީގެ ހުރިހާ ލީޑަރުން އެކުގައި މަސައްކަތް ކުރުމަށް އެއްބަސްވެވިފައިވާ ކަމަށާއި، އެކަމަށް މިހާރު ވެސް މަޝްވަރާ ކުރަމުންދާކަމަށެވެ.
”އިރާދަކުރެއްވިއްޔާ މިހާ ހިސާބަށް އާދެވުނު އިރުގައި އަޅުގަނޑުމެން މި ވަނީ މިކަމަށް ހައްލެއް ހޯދާފައި. އާންމު މެންބަރު އެ އެދޭ ގޮތަށް އަޅުގަނޑުމެން މުޅި ލީޑާޝިޕް އެކީގައި މަސައްކަތް ކުރެވޭނެ ގޮތްތަކެއް އިރާދަކުރެއްވިއްޔާ އަޅުގަނޑުމެންނަށް މިހިސާބަށް އާދެވުނުއިރު ހޯދިއްޖެ،“ އިބޫ ވިދާޅުވި އެވެ.
ޕާޓީގެ ތެރޭގައި އޮތް ހަމަނުޖެހުމަށް އިޝާރާތްކުރައްވަމުން އިބޫ ވިދާޅުވީ މައްސަލަތައް ހައްލުކޮށް އެކުގައި މަސައްކަތް ކުރުމަށް ކުރިއަށްދާ މަޝްވަރާތަކުގައި އެމަނިކުފާނު ވެސް ބައިވެރިވެވަޑައިގެންނެވި ކަމަށެވެ. އަދި އެމްޑީޕީ ދާނީ ކުރިއަށް ކަމަށާއި، 2028 ވަނަ އަހަރުގެ އިންތިހާބު ކާމިޔާބު ކުރުމަށްޓަކައި އެޕާޓީގެ ލީޑާޝިޕް އޮންނާނީ އެކީގައި ކަމަށްވެސް ވިދާޅުވިއެވެ.
މީގެ އިތުރުން އިބޫ ވަނީ އެޕާޓީން މަސައްކަތްކުރާނީ އެމްޑީޕީގެ އެއްވެސް ލީޑަރު ބާކީވެނުވާ ކަހަލަ ގޮތަކަށް ހިސާބު ކުރެވިގެން ކަމަށް ވިދާޅުވެފަ އެވެ.
”އަޅުގަނޑުމެން އެމްޑީޕީ އިރާދަކުރެއްވިއްޔާ ކުރިއަށްދާނީ 2028 ވަނަ އަހަރުގެ އިންތިހާބު ކާމިޔާބު ކުރުމަށްޓަކައި ހަމަ އަޅުގަނޑުމެންގެ ލީޑާޝިޕް އިރާދަކުރެއްވިއްޔާ އެކީގައި އޮވެގެން. އެއްވެސް ލީޑަރު ބާކީވެނުވާ ކަހަލަ ގޮތަކަށް ހިސާބު ކުރެވިގެން،“ އިބޫ ވިދާޅުވި އެވެ.
ނިމިދިޔަ ލޯކަލް ކައުންސިލް އިންތިޚާބުގައި އެމްޑީޕީއަށް ލިބުނު ކަމިޔާބީ ފާހަގަކުރުމަށް ބޭއްވި ޖަލްސާގައި ހިނގާދިޔަ ކަންތައްތަކަށްފަހު، އެމްޑީޕީގެ ހުރިހާ ލީޑަރުން، އަދި އެޕާޓީގައި އިސްކޮށް ތިބި މީހުން މަޝްވަރާކޮށް މިއަށް ހައްލެއް ހޯދުމުގެ މަސައްކަތް ކުރަމުން ދާކަން ފަހަގަކުރައްވާ އިބޫ ވިދާޅުވީ އެބޭފުޅުންގެ އަމާޒަކީ ސުލްހައިގެ މަޝްވަރާތައް މާދަމާ ރޭގެ ނިޔަލަށް ނިންމާލުން ކަމަށެވެ. އަދި އެ މަސައްކަތުގެ އަމާޒަކީ އެމްޑީޕީ ތެރޭގައިއޮތް މައްސަލަތަކަށް ހައްލެއް ގެނެސް ޕާޓީގެ މެންބަރުން އެދޭ ގޮތަށް 2028 ވަނަ އަހަރުގެ ރިޔާސީ އިންތިހާބަށް އަމާޒު ހިފުން ކަމުގައި އިބޫ ވިދާޅުވި އެވެ.
އެމްޑީޕީގެ ތެރޭގައި ތިން ހަތަރު ފެކްޝަން އުފެދިފައިވާއިރު، މި އެންމެންގެ ތެރޭގައި މިހާބޮޑަށް މައްސަލަ ހޫނުވީ ކައުންސިލް އިންތިހާބުގެ ކާމިޔާބީ ފާހަގަ ކުރަން އެމްޑީޕީން ބޭއްވި ޖަލްސާގައި ވާހަކަ ދެއްކުމުގެ ފުރުސަތު ކުޜީގެ ރައީސް ނަޝީދަށް ނުދިނުމުންނެވެ.
އޭގެ ފަހުން، އެމްޑީޕީގެވަގުތީ ޗެއާޕާސަން އަބްދުލްޣަފޫރު މޫސާ ވަނީ އެޕާޓީގެ އަސާސީ ޤަވާއިދާ ޚިލާފަށް އިސް 2 ބޭފުޅަކު މަގާމުން ވަކިކޮށްފައެވެ. އެހިސާބުން ވަގުތީ ޗެއާޕާސަން ކަމުން ޣަފޫރު ަވކި ކުރުމުގެ މަސައްކަތް އެމްޑީޕީގެ ނަޝީދުގެ ފެކްޝަނުން އިސްނަގައިގެން ވަނީ ފަށައިފަ އެވެ. އެހެންނަމަވެސް ޣަފޫރު ވިދާޅުވީ އިސްތިއުފާ ދެއްވަން ޖެހޭ ސަބަބެއް ނެތްކަމަށާއި، އެކަން ނުކުރައްވާނެ ކަމަށެވެ.
އެމްޑީޕީ ގެ އެންމެ ހިތްގައިމު ކަމަކީ ދެބަސްވުމަށް އޮންނަ ފުޅާ ޖާގަ. އަދި ދެބަސްވުމުގެ ތެރެއިން އެއްބަސްވެ އެކުގައި ކުރިއަށް ދާ ދިއުން.
ޕާޓީގެ މަސްލަހަތުގައި އެންމެން އެއްކުރުމަށް އަބަދުވެސް ކުރީގެ ޗެއަރ @faya_i އިސްނަންގަވާ ކުރައްވާ މަސައްކަތަށް… pic.twitter.com/FD0A1XjhoR
— Moosa Ali Manik 🇲🇻 (@VMookey) April 10, 2026
އެމްޑީޕީ ތެރޭގައި ހިނގާދިޔަ ހަމަނުޖެހުމަށް ފަހު އަނެއްކާވެސް ގުޅުން ބަދަހިކުރަމުންދާތީ އެޕާޓީގެ މެންބަރުން ދަނީ ސޯޝަލްމީޑިއާގައި އެކަން ފާހަގަކުރަމުންނެވެ.
