މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން ޚަރަދުތައް ކުޑަކުރުމުގެ ގޮތުން ރޯޑް ޑިވެލޮޕްމަންޓް ކޯޕަރޭޝަން (އާރްޑީސީން) ފިޔަވަޅުތަކެއް އަޅަން ނިންމައިފިއެވެ.
މިކަން ހާމަކޮށް އާރްޑީސީން ނެރުނު ނޫސްބަޔާނެއްގައި ބުނެފައިވަނީ، މެދުއިރުމަތީގައި ހިނގަމުންދާ ހަނގުރާމައާ ގުޅިގެން ރާއްޖޭގެ އިޤތިޞާދަށް ކުރިމަތިވެދާނެ ހިރާސްތައް ކުޑަކުރުމަށް ޓަކައި ދުރު ރާސްތާއަށް ވިސްނައި، ގެއްލުންތައް ކުޑަކުރުމުގެ ގޮތުން ސަރުކާރުން އަޅަމުންދާ ފިޔަވަޅުތަކަށް އެއްބާރުލުން ދިނުމުގެ ގޮތުން ޚަރަދު ކުޑަކުރުމުގެ ފިޔަވަޅުތައް އެޅުމަށް ނިންމާފައިވާ ކަމަށެވެ.
ޚަރަދުކުޑަކުރުމުގެ ގޮތުން އެ ކުންފުނިން އަޅަން ނިންމާފައިވާ ބައެއް ފިޔަވަޅުތަކުގެ ތެރޭގައި:
- ރާއްޖެިއން ބޭރަށް ކޮންމެހެން ކުރަންޖެހޭ ރަސްމީ ދަތުރުތައް ފިޔަވައި އެހެން ދަތުރުތައް ކުރުން މި ވަގުތަށް ހުއްޓާލުން
- ރާއްޖެއިން ބޭރަށް ކުރާ ދަތުރުތައް މަދުކޮށް، ބައިނަލްއަޤްވާމީ ކަސްޓަމަރުންނާއި ސަޕްލަޔަރުންނާއި އޮންލައިންކޮށް ބައްދަލުކުރުން
- ރާއްޖެއިން ބޭރަށް ކޮންމެހެން ކުރާ ރަސްމީ ދަތުރުތަކުގައި ބިޒްނަސް ކްލާހުން ދަތުރު ނުކުރުން
- ދަތުރުގެ ހުރިހާ ޚަރަދެއް ބޭރުގެ ފަރާތްތަކުން ދޭ ދަތުރުތަކުގައި ކުންފުނިން ކުރާ ޚަރަދު ކުޑަކުރުން
- ރާއްޖެއިން ބޭރަށް ކުރާ ޓްރެއިނިންގ ދަތުރުތައް މި ވަގުތަށް ހުއްޓާލައި، މިފަދަ ޕްރޮގްރާމްތަކުގައި އޮންލައިންކޮށް ބައިވެރިވުން
- ފެރީގެ ޚިދުމަތް ލިބޭ ސަރަޙައްދުތަކުގައި ކުރަންޖެހޭ ދަތުރުތައް ފެރީ މެދުވެރިކޮށް ކުރުން
- ކުންފުންޏާށް ސީދާގޮތުން ފައިދާވާ ބޭރުގެ މަހާސިންތާތަކާއި، ފެއަރތަކުގައި މެނުވީ ބައިވެރިނުވުން
- އޮފީހުގެ ބަޖެޓުން ޚަރަދު ކޮށްގެން ކުރަންޖެހޭ ދަތުރުތަކުގެ ތެރެއިން ކޮންމެހެން ކުރަންޖެހޭ ދަތުރެއް ނޫނީ ނުކުރުމަށާއި، މިފަދަ ދަތުރެއް ކުރަން ޖެހިއްޖެނަމަ ވީހާވެސް ޚަރަދު ކުޑަގޮތަކަށް ދަތުރުގެ އިންތިޒާމުތައް ހަމަޖެއްސުން
- ފޯނާއި އިންޓާރނެޓާއި، ފެނާއި ކަރަންޓު އަދި މިނޫން ވެސް އޮޮފީސް ހިންގުމުގެ ޚަރަދުތައް ކުޑަކޮށް ހަމަޖެއްސުން
- އޮފީހުގައި ކަރަންޓު ބޭނުންކުރާ މެޝިނަރީއާއި، އިކުއިޕްމަންޓާއި، އެހެނިހެން އާލާތްތައް ބޭނުން ނުކުރާ ވަގުތުތަކުގައި ނިއްވާލުން
- އޮފީހުގެ އެތެރޭގައި ކުރަންޖެހޭ މުޢާމަލާތްތަކުގައި، ވީހާވެސް މަދުން ކަރުދާސް ބޭނުންކުރާ ގޮތަށް ހަމަޖެއްސުން
- އިތުރުގަޑީގައި މަސައްކަތް ކުރަން ނުޖެހޭ ގޮތަށް މަސައްކަތްތައް ރާވާ ކުރިއަށް ގެންދިއުން
އާރްޑީސީގެ އިތުރުން ސަރުކާރުގެ އެހެން ބައެއް ކުންފުނިތަކުގައި ވެސް ޚަރަދު ކުޑަކުރުމުގެ ފިޔަވަޅުތައް އެޅުމަށް ވަނީ ނިންމައިފައެވެ.
