މިދިޔަ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ އިންތިޚާބުގެ ނަތީޖާއިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ރައްޔިތުން ކުރާ އިތުބާރު ހާމަވެގެން ގޮސްފިކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
ޝުޖާއު މި މޭރުމުން ވިދާޅުވީ އެމްއެމްޓީވީން ގެނެސްދިން ”ދިވެހީންގެ ނިންމުން“ ޕްރޮގްރާމުގައި ވާހަކަދައްކަވަމުންނެވެ. އެ ޕްރޮގްރާމުގައި ވާހަކަދައްކަވަމުން ޝުޖާއު ވިދާޅުވީ، އިންތިޚާބުގެ ނަތީޖާއިން އެނގިގެން ދިޔައީ 2028 ވަނަ އަހަރުގެ ރިިޔާސީ އިންތިޚާބު ކާމިޔާބުކުރުމަށް ރައީސް މުޢިއްޒަށް އެއްވެސް ދަތިކަމެއް ނެތް ކަމަށެވެ.
ލޯކަލް ކައުންސިލްތަކުގެ އިންތިޚާބުގެ ނަތީޖާއިން އިދިކޮޅު އެމްޑީޕީން ސިޔާސީ މަންފާއެއް ހޯދުމަށް މަސައްކަތްކުރަމުންދާކަން ފާހަގަކުރައްވަމުން ޝުޖާއު ވިދާޅުވީ، ރައްޔިތުން އެދޭ ގޮތަށް ކަންކަން ނިންމަވާނެކަމުގެ ޔަޤީންކަން އޮތުމުން، ރައީސް މުޢިއްޒުގެ ސިޔާސަތުތަކަށް ރައްޔިތުން ތާއީދުކުރާ މިންވަރު އެ ނަތީޖާއިން ވެސް ހަމައެކަނި ހާމަވެގެން ގޮސްފައިވާ ކަމަށެވެ.
”މި ނަތީޖާއިން ދައްކައިދިނީ ރައީސަށް ރައްޔިތުން ކުރާ އިތުބާރު. އެ ބޭފުޅުންނަށް އެނގިވަޑައިގަންނަވާ ރައީސް މުޢިއްޒުގެ އަރިހުން މިވެނިކަމެއް ނުކުރާށޭ ނުވަތަ މިވެނި ކަމެއް ކުރާށޭ ބުނެ ނިންމައިފިނަމަ އެެކަމެއް ކުރާނެ ކަން،“ – ޝުޖާޢު ވިދާޅުވިއެވެ.
ޝުޖާއު އިތުރަށް ވިދާޅުވީ، 2021 ވަނަ އަހަރުގެ ލޯކަލް ކައުންސިލްތަކުގެ އިންތިޚާބުން އިބުރަތް ލިބިގަނެ، 2023 ވަނަ އަހަރުގެ ރިޔާސީ އިންތިޚާބުގައި އެމްޑީޕީ ބަލިކުރި ގޮތަށް، 2028 ވަނަ އަހަރުގެ ރިޔާސީ އިންތިޚާބުގައި ވެސް އެ ޕާޓީ ބޮޑުތަނުން ބަލިކުރެވޭނެ ކަމަށެވެ.
