މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅިގެން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ޚަރަދު ކުޑަކުރުމުގެ ފިޔަވަޅުތައް އަޅަން ނިންމައިފިއެވެ.
އެމްޕީއެލްއިން މިކަން ހާމަކޮށްފައިވަނީ މިއަދު ނެރުނު ނޫސްބަޔާނެއްގައެވެ. އެ ނޫސްބަޔާނުގައި އެމްޕީއެލްއިން ވަނީ ޚަރަދު ކުޑަކުރުމަށް އަޅަން ނިންމާފައިވާ ފިޔަވަޅުތަކުގެ ތަފްޞީލް ހާމަކޮށްފައެވެ. ޚަރަދު ކުޑަކުރުމުގެ ގޮތުން އެމްޕީއެލްއިން އަޅަން ނިންމާފައިވާ ބައެއް ފިޔަވަޅުތަކުގެ ތެރޭގައި:
- ޝިފްޓް އުޞޫލުން މަސައްކަތްނުކުރާ އިދާރީ މުވައްޒަފުންގެ ރަސްމީ މަސައްކަތުގެ ގަޑި ކުރުކުރުން
- އޮަޕަރޭޝަނަލް ޝިފްޓްތަކުގައި މަސައްކަތްކުރާ މުވައްޒަފުންގެ މަސައްކަތުގެ ގަޑި ދުވާލަކު 8 ގަޑިއިރަށްވުރެ އިތުރުނުކުރުން
- ރާއްޖެއިން ބޭރަށް ކޮންމެހެން ކުރަންޖެހޭ ރަސްމީ ދަތުރުތައް ފިޔަވައި އެހެން ދަތުުރުތައް ކުރުން ހުއްޓާލުން
- ބޭރުގެ ފަރާތްތަކުން ދަތުރުގެ ހުރިހާ ޚަރަދެއް ހަމަޖައްސާ ދަތުރުތަކުގައި ވެސް އެ ކުންފުނިން ކުރާ ޚަދަރުތައް ވީހާވެސް ކުޑަކުރުން
- ރާއްޖެއިން ބޭރުގައި ތިބި ކަސްޓަމަރުންނާއި ސްޕްލަޔަރުންނާއެކު އޮންލައިންކޮށް ބައްދަލުވުންތައް ބޭއްވުން
- ރާއްޖެއިން ބޭރަށް މުވައްޒަފުން ފޮނުވައިގެން ކުރިއަށްގެންދާ ޓްރެއިނިންގތައް ހުއްޓާލައި، އޮންލައިންކޮށް މިފަދަ ޕްރޮގްރާމްތަކުގައި ބައިވެރިވުން
- މޯލްޑިވްސް މެރިޓައިމް ކޮންފަރެންސް 2026 ފަސްކުރުން. މި ކޮންފަރެންސް މިހާރު ބޭއްވުމަށް ހަމަޖެހިފައިވަނީ މި އަހަރުގެ އޮކްޓޯބަރ މަހުގެ 5 ވަނަ ދުވަހު
- ކަރަންޓުގެ ޚަރަދު ކުޑަކުރުން
- ކަރަންޓަށް ކުރާ ހޭދަ ކުޑަކުރުމަށް ޓަކައި ޚާއްޞަ ފިޔަވަޅުތަކެއް އެޅުމާއި، ކަރަންޓު އިސްރާފު ކުޑަކުރެވޭނެ އާދަތަކަށް މުވައްޒަފުންގެ އަޙުލުވެރިކުރުމަށް ހަރަކާތްތަކެއް ހިންގުން.
ޚަރަދު ކުޑަކުރުމަށް އޮަޕަރޭޝަނަލް ޝިފްޓްތަކުގައި މަސައްކަތްކުރާ މުވައްޒަފުންގެ މަސައްކަތުގެ ގަޑި ދުވާލަކު 8 ގަޑިއިރަށްވުރެ އިތުރުނުކުރުމަށް ނިންމާފައިވީ ނަމަވެސް، މުދާ ބޭލުމާއި މުދާ ކްލިއަރކުރުމުގެ މަސައްކަތްތައް ހިނގާ ވަގުތުތަކަށް އެއްވެސް ބަދަލެއް އެމްޕީއެލްއިން ގެނެސްފައެއް ނުވެއެވެ. މި ބަދަލާއެކު ވެސް، މުދާ ބޭލުމާއި މުދާ ކްލިއަރކުރުމުގެ ޚިދުމަތް މިހާރެކޭ އެއްގޮތަށް ލިބޭނެކަމުގެ ޔަޤީންކަން އެކުންފުނިން ވަނީ ދީފައެވެ.
