ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލް (އޭއެސްއެމްއެޗް) ގައި މިއަހަރުގެ ތެރޭގައި އެމްއާރްއައިގެ ޚިދުމަތް ފެށުމަށް ތައްޔާރުވަމުންދާކަމަށް އެ ހޮސްޕިޓަލުގެ ސީއީއޯ އަހުމަދު އަޝްރަފް ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި އަޝްރަފް ވިދާޅުވީ، ތިނަދޫގައި އެމްއާރްއައިގެ ޚިދުމަތް ޤާއިމްކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ކަމަށާއި، އެ މަސައްކަތް މިހާރު ބާރު މިނުގައި ކުރިއަށްދާ ކަމަށެވެ.
އެގޮތުން، އެމްއާރްއައި މެޝިން ބެހެއްޓުމަށް ހަވާލުކުރެވުނު ކުންފުނިން މިހާރު ތިނަދޫއަށް ޒިޔާރަތްކޮށް، ސައިޓް ބަލާފައިވާ ކަމަށާއި، ރަސްމީކޮށް އެ ސައިޓް އެ ފަރާތާ ހަވާލުކުރުމުގެ ލިޔުންތައް ވެސް މިހާރު ވަނީ ފޮނުވާފައެވެ.
”އަޅުގަނޑުމެން ޤަބޫލުކޮށްގެން މިތިބީ މިއަހަރުގެ ފަހު ކުއާޓަރގައި އެމްއާރްއައިގެ ޚިދުމަތް ތިނަދޫގައި ފެށިގެންދާނެ ކަމަށް،“ އަޝްރަފް ވިދާޅުވިއެވެ.
މީގެ އިތުރުން، އެ ހޮސްޕިޓަލުގައި ހައިޕަރބެރިކް ޗެމްބަރއެއް (ޑީކޮމްޕްރެޝަން ޗެމްބަރ) ބެހެއްޓުމުގެ މަސައްކަތް ވެސް ކުރަމުންދާ ކަމަށް އޭނާ ފާހަގަކުރެއްވިއެވެ. އަޝްރަފް ވިދާޅުވީ އެމްއާރްއައިގެ ޚިދުމަތަށްވުރެ ވެސް ކުރިން، މިއަހަރުގެ ތެރޭގައި ހައިޕަރބެރިކް ޗެމްބަރގެ ޚިދުމަތް އޮޕަރޭޝަނަށް ގެނައުމަށް މަސައްކަތް ކުރަމުންދާ ކަމަށެވެ. އަދި 2026 ވަނަ އަހަރު ނިމުމުގެ ކުރިން މި ދެ ޚިދުމަތް ވެސް ފުރިހަމައަށް ރައްޔިތުންނަށް ލިބިގެންދާނެ ކަމުގެ ޔަޤީންކަން އޭނާ ދެއްވިއެވެ.
ރާއްޖޭގެ ސިއްޙީ ދާއިރާ ހަރުދަނާކޮށް، އަތޮޅުތަކުގެ ހޮސްޕިޓަލްތަކުގެ ފެންވަރު މަތިކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ތިނަދޫ ހޮސްޕިޓަލުގެ ޢުމްރާނީ ތަރައްޤީއާއި ޚިދުމަތްތައް ފުޅާކުރުމަށް ގިނަ މަޝްރޫޢުތަކެއް އަންނަނީ ހިންގަމުންނެވެ. މި ބަދަލުތަކާއެކު، ދެކުނުގެ ރައްޔިތުން ސިއްޙީ ފަރުވާއަށް މާލެއަށް ކުރަންޖެހޭ ދަތުރުތައް މަދުވެ، ފަސޭހަކަމާއެކު ޚިދުމަތް ލިބިގެންދާނެއެވެ.
