ނިމިދިޔަ ލޯކަލްކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބުގައި ރައީސް ނަޝީދު މަސައްކަތްކުރެއްވީ އެމްޑީޕީއާއި ދެކޮޅަށްކަމަށް ދޭހަވާ މޭރުމަކުން އެމްޑީޕީގެ ވަގުތީ ޗެއާޕާސަން އަބްދުލްޣަފޫރު މޫސާ ވާހަކަ ދައްކަވައިފިއެވެ.
އެމްޑީޕީގެ ތެރޭގައި ކޯޅުން ބޮޑުވެފައިވަނިކޮށް ސޯޝަލްމީޑިއާގައި ޣަފޫރުގެ ވީޑިއޯއެއް ދަނީ ދައުރުވަމުންނެވެ. އެވީޑިއޯގައި ޣަފޫރު ވިދާޅުވީ މި ހަމަނުޖެހުމުގެ އަސްލަކީ ނަޝީދު ކަމަށެވެ. އެގޮތުން ނިމިދިޔަ އިންތިޚާބުގެ ކެމްޕޭނަށް ބޮޑެތި ސިޓީތަކަށް ވަޑައިގަންނަވަން ދަޢުވަތު ދެއްވީމާވެސް ނަޝީދު އެކަމަށް އިންކާރު ކުރެއްވި ކަމަށާއި، ދިމާލަށް ނުދާނަމޭ ވިދާޅުވީކަމަށް ޣަފޫރު ތަފްސީލު ކޮށްދެއްވިއެވެ.
”ރާއްޖޭގެ ބޮޑެތި ސިޓީތަކަށްދާން ރައީސް ނަޝީދަށް ދަޢުވަތުދީފަ ހުރިހާ ލީޑަރުން އެއްކޮށް ދާންވެގެން ޕްރޮގްރާމް ހަދާފަ ދިނިން. ރައީސް ނަޝީދު އަޅުގަނޑުމެންނާ އެއްކޮށް ނުވަޑައިންނެވީ، ނުދާނެމޭ ބުނެ ނުދިޔައީ“ ޣަފޫރު ވިދާޅުވިއެވެ.
ރައީސް ނަޝީދު އެކުގައި ވަޑައިނުގަތުމުން އެމްޑީޕީ ލީޑަރޝިޕުން އައްޑޫސިޓީ އާއި އެހެނިހެން ސިޓީތަކަށް ވަޑައިގެންނެވުމަށްފަހު އެނބުރި މާލެ ވަޑައިގަތުމުން އެތަންތަނުން ފެނުނު ޖޯޝާއި ފޯރި (ކްރައުޑް) ފެނިވަޑައިގެން ނަޝީދު ފަހުން އަމިއްލައަށް ވަޑައިގަތީ ކަމަށްވެސް ޣަފޫރު ވިދާޅުވިއެވެ.
ޙަޤީޤަތަކީ މިއީ ކަމަށާއި، އެމްޑީޕީ މިއަދު އެއްގަލަކަށް އަރައިގެން މަސައްކަތްކުރަން ޖެހޭކަމަށް ޣަފޫރު ވިދާޅުވިއެވެ. މިއާއިއެކު ޣަފޫރުވަނީ ނަޝީދުއަށް ތުހުމަތެއްވެސް ކުރައްވާފައެވެ.
އޭނާ ވިދާޅުވީ މާލޭގެ މޭޔަރުކަމާއި، ގޮނޑިތަކަށް ހޮވުނު ކެންޑިޑޭޓުންނާއެކު ދޮރުންދޮރަށް ޙަރަކާތުގައި ބައިވެރިވެދިނުމަށް އެދި ރައީސް ނަޝީދުގެ އަރިހުގައި އާދޭސްކުރިނަމަވެސް އެކަމަށް އިންކާރުކުރެއްވީ ކަމަށެވެ. އަދި ކުރީގެ ރައީސް ޔާމީނުގެ ތާއީދާއެކު މާލޭގެ މޭޔަރުކަމަށް އަމިއްލަގޮތުން ވާދަކުރެއްވި އިސްމާއިލް ޒަރިޔަންދުއަށް ލިބުނު ވޯޓަކީ ޔާމީނުގެ ވޯޓު ނޫންކަމަށާއި، އެކަންވީގޮތް އެމްޑީޕީ މީހުންނަށް ވަރަށް ރަނގަޅަށް އެނގޭނެ ކަމަށްވެސް ޣަފޫރު ވިދާޅުވިއެވެ. ބެލެވޭ ގޮތުގައި ޣަފޫރު އެވިދާޅުވީ ޒަރިޔަންދުއަށް ނަޝީދުގެ ސަޕޯޓަރުންގެ ވޯޓު ލިބުނު ވާހަކައެވެ. ކައުންސިލް އިންތިޚާބުގައި ޔާމީންވެސް ވަނީ ނަޝީދު އެދޭފަދައިން ނަޝީދުގެ ތަސައްވުރަށް ތާއީދު ކުރާކަން ހާމަކުރައްވާ ވާހަކަފުޅު ދައްކަވާފައެވެ.
ޣަފޫރު މިމޭރުމުން ވާހަކަ ދެއްކެވިނަމަވެސް، ނިމިދިޔަ އިންތިޚާބުގައި އެމްޑީޕީއަށް ތާއީދު ހޯދުމަށް ނަޝީދުވެސް ކެމްޕޭނު ޙަރަކާތްތަކުގައި ވަރަށް ބޮޑަށް އުޅުއްވި މަންޒަރު ފެނިގެން ދިޔައެވެ. އެހެންނަމަވެސް އިންތިޚާބުގައި ރަނގަޅު ނަތީޖާއެއް އެމްޑީޕީއަށް ލިބުމާއެކު، ނަޝީދު ފެޔަށް ޖެއްސީ ކަމަށާއި، މިކަމުގައި ޣަފޫރު އިސްކުރެއްވީ ވަކިބައެއްގެ މަސްލަޙަތުކަމަށްބުނެ އެމްޑީޕީގެ އާންމު މެންބަރުން ދަނީ ނުރުހުން ފާޅުކުރަމުންނެވެ. މި ކޯޅުންގަނޑުގެ ތެރެއިން އެމްޑީޕީގެ އިސް 2 މެންބަރަކު ޕާޓީގެ މަޤާމުންވެސް ވަނީ ވަކިކޮށްފައެވެ.
މިކަމާއި ގުޅިގެން އެމްޑީޕީގެ ބައެއް އިސް މެންބަރުން ވަނީ ވަގުތީ ޗެއާޕާސަން ޣަފޫރު ގެ އިތުބާރު ނެތްކަމުގެ މައްސަލައިގެ ޕެޓިޝަނުގައި 55 މެމްބަރުން ސޮއިކޮށް، އެ ޕާޓީގެ ގައުމީ މަޖިލީހުގެ ޖަލްސާއެއް ބާއްވައި ދިނުމަށް އެދި ހުށަހަޅައިފައެވެ.
