އެމްޑީޕީގެ އެތެރޭގެ ކޯޅުން ބޮޑުވެ، ޗެއަރޕާސަން ކަމުގެ މަޤާމުން ޢަބްދުލްޣަފޫރު މޫސާގެ ވަކިކުރުމަށް 50 އަށްވުރެ ގިނަ މެންބަރުންގެ ސޮއިއާއެކު އެ ޕާޓީގެ ޤައުމީ މަޖިލީހަށް ހުށަހަޅައިފިއެވެ.
ޗެއަރޕާސަން ކަމުގެ މަޤާމުން ޣަފޫރު ވަކިކުރުމަށް 50 އަށްވުރެ ގިނަ މެންބަރުންގެ ސޮއިއާއެކު އެމްޑީޕީގެ ޤައުމީ މަޖިލީހަށް ހުށަހަޅާފައިވަނީ ކުރީގެ ރައީސް، މުޙައްމަދު ނަޝީދުގެ ފެކްޝަނުންނެވެ. އެ މަޤާމުން ޣަފޫރު ވަކިކުރަން ނަޝީދުގެ ފެކްޝަނުން އިސްވެ މަސައްކަތް ފަށާފައިމިވަނީ ލޯކަލް ކައުންސިލްތަކުގެ އިންތިޚާބުން އެމްޑީޕީއަށް ލިބުނު ކާމިޔާބީ ފާހަގަކުރަން ބޭއްވި ރަސްމިއްޔާތުގައި ވާހަކަދެއްކެވުމުގެ ފުރުޞަތު ނަޝީދަށް ނުދިނުމުގެ ސަބަބުންނެވެ.
”އެކި އެމްވީ“ އަށް މަޢުލޫމާތު ލިބިފައިވާ ގޮތުގައި، އެ ރަސްމިއްޔާތުގައި ވާހަކަދެއްކެވުމުގެ ފުރުޞަތު ނަޝީދަށް ނުދޭން އެންގީ ކުރީގެ ރައީސް އިބްރާހިމް މުޙައްމަދު ޞާލިޙުއެވެ. މި މައްސަލައާ ގުޅިގެން އެމްޑީޕީ ތެރޭގައި ވަނީ ވަރަށް ބޮޑެތި ބައިބައިވުންތަކެއް އުފެދި އެއް ބަޔަކު އަނެއް ބަޔަކަށް އެކި ކަންކަމުގައި ސީރިއަސް ތުޙުމަތުތަކެއް ކުރަން ފަށައިފައެވެ.
އެމްޑީޕީގެ ޗެއަރޕާސަން ކަމުގެ މަޤާމަށް ޢަބްދުލްޣަފޫރު މޫސާ އިންތިޚާބުކުރީ މިދިޔަ ޑިސެމްބަރު މަހުގެ ތެރޭގައި އެ ޕާޓީގެ ޤައުމީ މަޖިލީހުގެ 65 މެންބަރުންގެ ތާއީދާއެކުގައެވެ. އެ މަޤާމުން އޭނާ ވަކިކުރުމަށް ޕެޓިޝަނުގައި ސޮއިކުރަން ފަށާފައިވާއިރު މިހާތަނަށް 55 މެންބަރަކު ވަނީ އެ ޕެޓިޝަނުގައި ސޮއިކޮށްފައެވެ. އޭގެ ތެރޭގައި ކުރީގެ ޑިފެންސް މިނިސްޓަރު މާރިޔާ އަޙްމަދު ދީދީ އާއި އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއިލް ހިމެނިވަޑައިގަންނަވައެވެ.
