ބޭންކް އޮފް މޯލްޑިވްސް (ބީއެމްއެލް) އިން ދޭ ސްޕޯރޓްސް ސްކޮލަރޝިޕް މި އަހަރު ލިބޭ އެތުލީޓަކަށް މަޝްހޫރު ރާޅާއެޅުންތެރިޔާ ސައްޔިދު ޞަލާޙުއްދީން ހޮވިއްޖެއެވެ.
މިއީ ރާއްޖޭގައި ފާހަގަކޮށްލެވޭ އެތުލީޓުންގެ ހުނަރު ކުރިއަރުވައި، ކުޅިވަރުގެ މައިދާނުގައި ރަނގަޅު ކާމީޔާބީތައް ހޯދުމަށް އެހީތެރިވުމަށްދެވޭ ސްކޮލަރޝިޕެކެވެ. މި ސްކޮލަރޝިޕް ލިބޭ އެތުލީޓް ހޮވަނީ ބީއެމްއެލް އާއި މޯލްޑިވްސް އޮލިމްޕިކް ކޮމިޓީ (އެމްއޯސީ) އާއެކު ޤާއިމުކޮށްފައިވާ އެއްބަސްވުމެއްގެ ދަށުންނެވެ.
ބީއެމްއެލް އިން ހުރިހާ ޚަރަދެއް ފޯރުކޮށްދޭ މި ސްކޮލަރޝިޕަށް ހޮވޭ އެތުލީޓުންނަށް ހައި ޕާރފޯމަންސް ޓްރެއިނިންގ ސެންޓަރުތަކުގައި ތަމްރީނުވުމުގެ ފުރުޞުތު ވެސް ލިބިގެންދާނެއެވެ.
މި ސްކޮލަރޝިޕްގެ ދަށުން ޗައިނާ، ފިލިޕީންސް އަދި އިންޑޮނޭޝިއާގައި ސައްޔިދުގެ ޓްރެއިނިންގ ކުރިއަށް ގެންދިއުމަށް ވަނީ ހަމަޖެހިފައެވެ. މީގެ އިތުރުން އޮސްޓްރޭލިއާގައި ކުރިއަށްދާ މުބާރާތެއްގައި ވެސް އޭނާ ބައިވެރިވާނެއެވެ. މުބާރާތުގައި ޓްރެއިނިންގއަށް ބޭނުންވާ އިކުއިޕްމެންޓް، މި ސްކޮލަރޝިޕްގެ ދަށުން ފޯރުކޮށްދޭނެކަމަށް ބީއެމްއެލް އިން ވަނީ ބުނެފައެވެ.
ބީއެމްއެލް ސްޕޯޓްސް ސްކޮލަރޝިޕްގެ ދަށުން މިހާތަނަށް އަށް އެތުލީޓަކަށް ތަމްރީނުގެ ފުރުޞަތު ހޯދައިދީފައިވެއެވެ.
