ރައްުޔިތުންގެ މަޖިލިހުގެ މާފަންނު މެދު ދާއިރާގެ މެމްބަރު އަސްމާ ރަޝީދު ކޮންގްރެސް ޕާޓީގެ މެންބަރުކަމުން ވަކިކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންގެވި ކަމަށް ބުނެ ފަތުރަނީ ޙަޤީޤަތާ ޚިލާފު ދޮގު ވާހަކަތަކެއްކަމަށް އެ ޕާޓީގެ ޕާލަމަންޓްރީ ގްރޫޕުގެ ލީޑަރު އިބްރާހިމް ފަލާޙު ވިދާޅުވެއްޖެއެވެ.
ސަރުކާރާ ދެކޮޅަށް މަސައްކަތްކުރާނެކަމަށް ބުނެ، ފޯނު ކޯލެއްގައި އަސްމާ ދައްކާފައިވާ ވާހަކަތަކެއްގެ ރިކޯޑިންގ މީސް މީޑިއާގެ އެކި މަންސަތަކުގައި ވަނީ ދައުރުވެފައެވެ. 12 މިނެޓުގެ ފޯނު ކޯލުގެ ރިކޯޑިންގގައި އަސްމާ ވަނީ، ވެރިކަން ކުރާ ޕާޓީ ޕީއެންސީގެ ލީޑަރޝިޕްގައި ތިއްބެވި ފަރާތްތަކަކީ ދޮގުވެރި ބައެއްގެ ގޮތުގައި ސިފަކުރައްވައި، އެ ފަރާތްތަކުގެ ބޮލުގައި ދޮގު އިލްޒާމްތަކެއް އަޅުވައިފައެވެ. އަސްމާ ބުނީ ޕީއެންސީގެ ލީޑަރޝިޕުން އަންގާ އެއްވެސް އެންގުމަކަށް ބޯނުލަބާނެ ކަމަށާއި، އެ ފަރާތްތަކުން ވިދާޅުވާ އެއްވެސްކަމެއް ނުކޮށްދޭނެ ކަމަށެވެ.
މިކަމާ ގުޅިގެން އަސްމާގެ މައްސަލަ ޕީއެންސީގެ ޑިސިޕްލިނަރީ ކޮމިޓީން ބަލައި އެ ޕާޓީން ވަކިކުރަން ރައީސް މުޢިއްޒު އަންގަވާފައިވާކަމަށް ބުނެ މިހާރު ވަނީ އަޑުފެތުރިފައެވެ. މިކަމާ ގުޅިގެން ފަލާޙު ވިދާޅުވީ ޕީއެންސީގެ މެންބަރުކަމުން އަސްމާ ވަކިކުރުމަށް ރައީސް މުޢިއްޒު އަންގަވާފައިވާކަމަށް ބުނެ ދެކެވެމުން އަންނަނީ ދޮގު ވާހަކަތަކެއް ކަަމަށެވެ.
ފާހަގަކޮށްލެވޭ ގޮތުގައި، ސަރުކާރުން ޤާނޫނުއަސާސީއަށް ގެނެސްފައިވާ ބަދަލުތަކާއެކު، ޕީއެންސީން އަސްމާ ވަކިކޮށްފި ނަމަ، ރައްޔިތުންގެ މަޖިލީހުގެ މެންބަރުކަމުން އޭނާ ވަކިވާނެއެވެ.
ސަރުކާރާ ދެކޮޅަށް މަސައްކަތްކުރާނެކަމަށް ބުނެ މިފަދަ ވާހަކަތަކެއް އަސްމާ ދައްކާފައިވާ މި ދަނޑިވަޅުގައި އޭނާގެ ޢާއިލީ މީހުން ވަނީ ސަރުކާރުގެ ވަޒީފާތަކުން ވަކިކޮށްފައެވެ. އެގޮތުން އަސްމާގެ ދެ ދަރިން ކަމަށްވާ މުޙައްމަދު ޙުސައިން ޝަރީފް (މުންދު) އާއި އައިމިނަތު ޙުސައިން ޝަރީފްގެ އިތުރުން އަސްމާގެ އެއްބަނޑު އެއްބަފާ ކޮއްކޮ ޑރ. ސަލްމާ ރަޝީދު މީގެ ތެރޭގައި ހިމެނެއެވެ.
