ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީ މަގާމުން ރިޓަޔަރ ކުރެއްވުމަށް އަންގަވާފައިވާ ކަމަށް ބުނެ ސޯޝަލް މީޑިއާގައާއި ބައެއް މަންސަތަކުގައި ފަތުރަމުންދާ މައުލޫމާތަކީ ސައްހަ މައުލޫމާތެއް ނޫން ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.
ފަރުހާދު ފިކުރީ މަގާމުން ވަކިކޮށްފައިވާ ކަމަށް ބުނެ ދޮގު ހަބަރުތަކެއް ފެތުރެމުންދާތީ، އެކަމާ ގުޅިގެން މައުލޫމާތު ސާފުކުރުމުން ފުލުހުންގެ މުއައްސަސާއިން ބުނެފައިވަނީ އޭނާ މަގާމުން ރިޓަޔަރ ކުރެއްވުމަށް އެއްވެސް ފަރާތަކުން އަންގާފައި ނުވާ ކަމަށެވެ. އަދި ފަރުހާދު ފިކުރީ މިހާރު ވެސް ހުންނެވީ ޑެޕިއުޓީ ކޮމިޝަނަރ އޮފް ޕޮލިސްގެ މަގާމުގައި، މުއައްސަސާގެ ހިދުމަތުގައި ކަމަށް ފުލުހުން ކަށަވަރުކޮށްދީފައިވެއެވެ.
ފަރުހާދު ފިކުރީއަކީ ފުލުހުންގެ ހިދުމަތުގައި ގިނަ ދުވަސްތަކެއް ވަންދެން އިހުލާސްތެރި ހިދުމަތްތަކެއް ކުރައްވަމުންދާ ބޭފުޅެކެވެ. މިފަދަ ދޮގު މައުލޫމާތު ފެތުރުމުގެ މަގުސަދަކީ މުއައްސަސާގެ ތެރޭގައި ފިތުނަ އުފެއްދުން ކަމަށް ބެލެވޭތީ، ސައްހަ ނޫން މައުލޫމާތު ނުފެތުރުމަށް ކަމާބެހޭ ފަރާތްތަކުން އިލްތިމާސްކުރެއެވެ.
