ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި އިދިކޮޅު އެމްޑީޕީއަށް ކާމިޔާބީ ލިބުނީ ވަކި ބަޔަކު އެ ޕާޓީއަށް އެނބުރިއައިސްގެން ނޫންކަމަށް ކުރީގެ ރައީސް އިބްރާހިމް މުޙައްމަދު ޞާލިޙްގެ އަނބިކަނބަލުން ފަޒްނާ އަޙްމަދުގެ ކޮއްކޮ, ނަޒީހާ އަޙްމަދު ބުނެފިއެވެ.
ނަޒީހާ މި ބީދައިން ބުނެފައިވަނީ އެކްސްގައި ޙިއްޞާކުރި ޕޯސްޓެއްގައެވެ. އެ ޕޯސްޓުގައި ނަޒީހާ ބުނެފައިވަނީ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގައި އެމްޑީޕީއަށް ކާމިޔާބީ ލިބުނީ އެމްޑީޕީގެ މެންބަރުން އެކުގައި ނިކުމެ ކުރި ބުރަ މަސައްކަތުގެ ސަބަބުން ކަމަށެވެ. އެއީ ވަކި ބަޔަކު އެނބުރި އެމްޑީޕީއާ ގުޅުމުން ވީކަމެއް ނޫންކަމަށް އޭނާ ބުންޏެވެ.
މިކަމާ ގުޅިގެން ނަޝީދުގެ ސަޕޯޓަރުން އަންނަނީ ނަޒީހާއަށް ވަރަށް ބޮޑަށް ފާޑުކިޔަމުންނެވެ. އެގޮތުން ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުޙައްމަދު ވަހީދު (ވައްޑެ) ވަނީ ނަޒީހާއަށް ވަރުގަދަ ރައްދެއް ދެއްވައިފައެވެ. ނަޒީހާއަށް ރައްދުދެއްވަމުން ވައްޑެ ވިދާޅުވެފައިވަނީ އިންތިޚާބުން އެމްޑީޕީއަށް ކާމިޔާބީ ލިބުނީ ހުރިހާ ”ރޯލަޔަސް“ ގޭގައި ނުތިބެ މުޅި ރާއްޖޭގައި ކުރި އާދަޔާ ޚިލާފު ބުރަ މަސައްކަތުގެ ސަބަބުން ކަމަށެވެ.
ފާހަގަކޮށްލެވޭ ގޮތުގައި ނިމިދިޔަ އެމްޑީޕީ ސަރުކާރުގައި ކުރީގެ ރައީސް ޞާލިޙް އާއި ކުރީގެ ރައީސް ނަޝީދުގެ ގުޅުން ވަރަށް ބޮޑަށް ހީނަރުވެ ޕާޓީ ތެރޭގައި ބައިބައިވުން އުފެދުމާ ގުޅިގެން ރައީސް ނަޝީދުއާއި އޭނާގެ ސަޕޯޓަރުން ވަނީ ”ދަ ޑިމޮކްރެޓްސް“ ގެ ނަމުގައި އައު ސިޔާސީ ޕާޓީއެއް އުފައްދަވައިފައެވެ. އެއަށް ފަހު ޑިމޮކްރެޓްސް ޕާޓީއާއި ގުޅިވަޑައިގެން ރައީސް ނަޝީދު ވަނީ އެމްޑީޕީ ”ރޫޅާލާނަން“ ކަމަށް ވިދާޅުވެފައެވެ.
ރައީސް ނަޝީދު އެމްޑީޕީން ވަކިވެ އެހެން ސިޔާސީ ޕާޓީއަކާ ގުޅިވަޑައިތުމުގެ ސަބަބުން އެމްޑީޕީއަށް ވަނީ އިންތިޚާބުތަކުން ބައްޔާއި ކުރިމަތިލާންޖެހިފައެވެ. އެގޮތުން 2023 ވަނަ އަހަރުގެ ރިޔާސީ އިންތިޚާބާއި 2024 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިޚާބުގައި އެމްޑީޕީ ވަނީ ބޮޑުތަނުން ބަލިވެފައެވެ. ނަމަވެސް އެމްޑީޕީއާ އަލުން ގުޅިވަޑައިގެން ލޯކަލް ކައުންސިލްތަކުގެ އިންތިޚާބުގައި ރައީސް ނަޝީދު ކުރެއްވި ބުރަ މަސައްކަތުގެ ސަބަބުން އެ ޕާޓީ ހީނުކުރާ ވަރުގެ ކާމިޔާބީއެއް ވަނީ ލިބިފައެވެ.
