އިދިކޮޅު މައި ޕާޓީ އެމްޑީޕީގެ ލޯގޯގައި އިންނަންވީ ތިލަފަތެއްނޫން ކަމަށާއި ލޯގޯގެ ގޮތުގައި އިންނަންވީ ފޯއްކިބައެއް ކަމަށް ރައްޔިތުންގެ މަޖްލީހުގެ ބާރްށު ދާއިރާގެ މެންބަރު އަދި ސަރުކާރު ހިންގާ މައިޕާޓީ ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.
ބެލެވޭ ގޮތުގައި ޝުޖާއު މިފަދައިން ވިދާޅުވީ އެމްޑީޕީ އެތެރޭގައި މިވަގުތު ހިނގަމުންދާ ބޭ އިންސާފާއި، ނުޙައްޤު އަނިޔާއާއި އަމިއްލަ އެދުންތަކުގެ މައްޗަށް އިޝާރާތްކުރައްވަމުންނެވެ. އެއީ އެޕާޓީގެ ރައީސް ގަފޫރަކީ ވަރަށް ދުފުމަށް ލޯބިކުރައްވާ ފަރާތަކަށްވެފައި ނުޙައްޤުން އެމްޑީޕީގެ މެންބަރުންނަށް އަޅުއްވަމުން ގެންދަވާ ފިޔަވަޅުތަކާއި ގުޅިގެން މަޖާޒީ ގޮތުން ވިދާޅުވޖ އެއްޗެއްކަމަށް ބެލެވެއެވެ.
MDP ލޯގޯގަ އިންނަންވީ ތިލަފަތެއްނޫން.ފޯއްކިބައެއް 🤷🏻♂️
— Ibrahim Shujau (@IbrahimShujaau) April 6, 2026
އެގޮތުން ނިމިދިޔަ ކައުންސިލް އިންތިޚާބުން ހޯދި ރަނގަޅު ނަތީޖާއަކީ އެމްޑީޕީގެ ކުރީގެ ރައީސް ނަޝީދުއާއި ގުޅިގެން ހޯދި ކާމިޔާބީއެއްކަން ހަނދާން ނައްތާލާ ކަޟިޔާބީ ފާހަގަކުރަން ބޭއްވި ޖަލްސާގައި އެމްޑީޕީގެ ލީޑަރޝިޕުން ރައީސް ނަޝީދަށް ވާހަކަދެއްކުމުގެ ފުރުޞަތު ނުދޭން ނިންމާފައިވަނީ ކުރީގެ ރައީސް އިބްރާހިމް މުޙައްމަދު ޞާލިޙްގެ ސީދާ އެންގުމުގެ މަތިން ކަމަށްވެއެވެ. ސަބަބަކީ އަލުން ނަޝީދުގެ މަޤުބޫލުކަން އިތުރުވާން ފެށުންކަމަށް ގިނަބަޔަކު ދެކެއެވެ.
މިކަމުގެ ސަބަބުން އެ ޕާޓީގެ ގިނަ މެންބަރުންތަކެއް ވަނީ ރޭގެ ޖަލްސާ ބޮއިކޮޓްކޮށް ސޯޝަލްމީޑިއާގައި ކޯޅުން ފަށާފައެވެ. އެ ފަރާތްތަކުން ފާހަގަކުރާ ގޮތުގައި، މި ފަހަރުގެ ލޯކަލް ކައުންސިލްތަކުގެ އިންތިޚާބުގައި އެމްޑީޕީއަށް ކާމިޔާބީ ލިބިފައިވަނީ ރައީސް ނަޝީދު ކުރެއްވި ބުރަ މަސައްކަތުގެ ސަބަބުން ކަމަށެވެ.
މި ޖަލްސާގައި ވާހަކަ ދައްކަން ފުރުޞަތު ނުދިނުމުގެ ސަބަބުން ރައީސް ނަޝީދު ވަނީ އެމަނިކުފާނުގެ ނުރަސްމީ އެކްސް އެކައުންޓުގައި ޕޯސްޓެއް ޙިއްޞާކުރައްވައިފައެވެ. އެ ޕޯސްޓުގައި އެމަނިކުފާނު ވިދާޅުވީ، ”މި އުފާވެރި ރޭގައި ވަރަށް ހިތްދަތިވެއްޖެ“ ކަމަށެވެ. ވާހަކަދައްކަވަން ފުރުޞަތު ނުދިނުމުގެ ސަބަބުން ރައީސް ނަޝީދު އެ ޖަލްސާއަށް ވަޑައިގެންފައެއް ވެސް ނުވެއެވެ.
މިކަން މިހެން ހިނގާފައިވާއިރު ފާހަގަކޮށްލަންޖެހޭ ކަމަކީ، ކައުންސިލް އިންތިޚާބަށް ފަހު އެމްޑީޕީގެ ތެރޭގައި އަނެއްކާ ވެސް ދެބަސްވުން އުފެދި، ޕާޓީ ތެރޭގައި ބައިބައިވުން އުފެދިފައިވާ ކަމަށެވެ.
