އިދިކޮޅު އެމްޑީޕީން މިރޭ ބާއްވަމުންގެންދާ ޖަލްސާގައި، ކުރީގެ ރައީސް މުޙައްމަދު ނަޝީދަށް ވާހަކަދައްކަވަން ފުރުޞަތު ނުދޭން އެ ޕާޓީގެ ލީޑަރޝިޕުން ނިންމައިފިއެވެ.
މަޢުލޫމާތު ލިބިފައިވާ ގޮތުގައި، އެމްޑީޕީގެ ލީޑަރޝިޕުން މި ޖަލްސާގައި ވާހަކަދައްކަވަން ރައީސް ނަޝީދަށް ފުރުޞަތު ނުދޭން ނިންމާފައިވަނީ ކުރީގެ ރައީސް އިބްރާހިމް މުޙައްމަދު ޞާލިޙްގެ ސީދާ އެންގުމުގެ މަތިންނެވެ.
މިކަމުގެ ސަބަބުން އެ ޕާޓީގެ ގިނަ މެންބަރުންތަކެއް ވަނީ ޖަލްސާ ބޮއިކޮޓްކުރުމުގެ ހަރަކާތެއް ވެސް ފަށައިފައެވެ. އެ ފަރާތްތަކުން ފާހަގަކުރާ ގޮތުގައި، މި ފަހަރުގެ ލޯކަލް ކައުންސިލްތަކުގެ އިންތިޚާބުގައި އެމްޑީޕީއަށް ކާމިޔާބީ ލިބިފައިވަނީ ރައީސް ނަޝީދު ކުރެއްވި ބުރަ މަސައްކަތުގެ ސަބަބުން ކަމަށެވެ.
މި ޖަލްސާގައި ވާހަކަ ދައްކަން ފުރުޞަތު ނުދިނުމުގެ ސަބަބުން ރައީސް ނަޝީދު ވަނީ އެމަނިކުފާނުގެ ނުރަސްމީ އެކްސް އެކައުންޓުގައި ޕޯސްޓެއް ޙިއްޞާކުރައްވައިފައެވެ. އެ ޕޯސްޓުގައި އެމަނިކުފާނު ވިދާޅުވީ، ”މި އުފާވެރި ރޭގައި ވަރަށް ހިތްދަތިވެއްޖެ“ ކަމަށެވެ. ވާހަކަދައްކަވަން ފުރުޞަތު ނުދިނުމުގެ ސަބަބުން ރައީސް ނަޝީދު އެ ޖަލްސާއަށް ވަޑައިގެންފައެއް ވެސް ނުވެއެވެ.
މިކަން މިހެން ހިނގާފައިވާއިރު ފާހަގަކޮށްލަންޖެހޭ ކަމަކީ، ކައުންސިލް އިންތިޚާބަށް ފަހު އެމްޑީޕީގެ ތެރޭގައި އަނެއްކާ ވެސް ދެބަސްވުން އުފެދި، ޕާޓީ ތެރޭގައި ބައިބައިވުން އުފެދިފައިވާ ކަމަށެވެ.
