ދިވެހީންނަށް ވިސާއާއި ނުލާ މޮންގޯލިއާއަށް ދަތުރު ކުރެވޭ ގޮތަށް ފޮރިން މިނިސްޓްރީން ހަމަޖައްސައިފިއެވެ.
ފޮރިން މިނިސްޓްރީން މިއަދު ހާމަކުރި ގޮތުގައި، މި މަހުގެ 12 ވަނަ ދުވަހުން ފެށިގެން މޮންގޯލިއާއަށް ވިސާއާއި ނުލާ ދިވެހިންނަށް ދަތުރު ކުރެވޭނެ ކަަމަށެވެ.
ވިސާއަށް ދޭން ނިންމި މި ލުއީގެ ދަށުން ޑިޕްލޮމެޓިކް، އޮފިޝަލް އަދި އޯޑިނަރީ ޕާސްޕޯޓް އޮންނަ ދިވެހިންނަށް ވިސާއާއި ނުލާ އެއް މަސް ދުވަހުގެ މުއްދަތަށް މޮންގޯލިއާގައި ތިބެވޭނެ ކަމަށް މިނިސްޓްރީން ހާމަކުރިއެވެ.
ނަމަވެސް، މިދިޔަ އަހަރުގެ އޮގަސްޓް މަހުގައި ދެ ގައުމުގެ ދެމެދުގައި ސޮއިކުރި ވިސާއާއި ގުޅޭ އެއްބަސްވުމުގައި ވާ ގޮތުން ވަޒީފާ އަދާކުރުމަށާއި ކިޔަވުމަށާއި ވިޔަފާރި ދަތުރުތަކަށް ފަދަ ދިގު މުއްދަތަކަށް މަޑުކުރަންދާ ފަރާތްތަކަށް ވިސާ ބޭނުންވާނެ ކަމަށް މިނިސްޓްރީން ހާމަކުރެއެވެ.
މިހާރު ވިސާއާއި ނުލާ ދިވެހީންނަށް 94 ގައުމަކަށް ދަތުރުކުރެވެއެވެ.
