މިފަހަރުގެ ލޯކަލް ކައުންސިލް އިންތިޚާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ އިންތިޚާބުގައި ސިޔާސީ ތަޖުރިބާކާރު އަބްދުއްރަހީމް (ބަނަފްސާ) ގެ އުފަން ރަށް ލ. ފޮނަދޫ ކައުންސިލްގެ ހުރިހާ ގޮނޑިތަކެއް ވެރިކަން ކުރާ ޕީއެންސީ އިން ކާމިޔާބު ކޮށްފިއެވެ.
އިލެކްޝަންސް ކޮމިޝަން (އީސީ) އިން އިޢުލާނުކޮށްފައިވާ ވަގުތީ ނަތީޖާތަކަށް ބަލާއިރު، ފޮނަދޫ ކައުންސިލްގެ 5 ގޮނޑި އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ 5 ގޮނޑިއާއެކު، ޖުމްލަ 10 ގޮނޑި ވެސް ކާމިޔާބުކުރީ ސަރުކާރު ހިންގާ ޕާޓީ ޕީއެންސީގެ ކެންޑިޑޭޓުންނެވެ.
925 ވޯޓުން ފޮނަދޫ ކައުންސިލްގެ ރައީސަކަށް އިންތިޚާބުވެވަޑައިގަތީ ޕީއެންސީގެ ކެންޑިޑޭޓު އަހުމަދު ރިޔާޒެވެ. އޭނާއާ ވާދަކުރެއްވި އެމްޑީޕީގެ ކެންޑިޑޭޓު އިބްރާޙިމް އަހުމަދަށް ލިބިވަޑައިގަތީ 465 ވޯޓެވެ. މިއާއިއެކު ކައުންސިލްގެ ދެ ގޮނޑިއަށް އިންތިޚާބުވެވަޑައިގަތީ ޕީއެންސީގެ ކެންޑިޑޭޓު އަބްދުލްރައޫފު ޔޫސުފާއި ޕީއެންސީގެ ކެންޑިޑޭޓު އަހުމަދު މަމްދޫހެވެ. އަދި ފޮނަދޫގެ އަންހެނުންގެ ޚާއްޞަ ގޮނޑިއަށް އިންތިޚާބުވެވަޑައިގެންފައި ވަނީ ޕީއެންސީގެ ކެންޑިޑޭޓު ވަރުދާ ހުސެއިނާއި އައިޝަތު އަޒީމާއެވެ.
މީގެ އިތުރުން ފޮނަދޫ އަންހެނުންގެ ތަރައްޤީއަށް މަސައްކަތް ކުރާ ކޮމިޓީގެ ރައީސް ކަމަށް އިންތިޚާބުވެވަޑައިގަތީ ޕީއެންސީގެ ކެންޑިޑޭޓް އައިޝަތު ރިޝްމާއެވެ. އަދި ކޮމިޓީގެ މެމްބަރުންގެ ގޮތުގައި އިންތިޚާބުވެވަޑައިގަތީ އައިމިނަތު ރާފިއާ، ޝަކީލާ އަލީ، އައިޝަތު ޒޫނާ އަދި މަލަކާ މޫސާއެވެ.
