ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރުގެ މަޤާމުންނާއި ބޯޑު މެންބަރުކަމުގެ މަޤާމުން މޭޖަރ (ރިޓަޔަރޑް) މުޙައްމަދު ނަޖާޙް މިއަދު ވަކިކޮށްފިއެވެ.
ޕްރައިވަޓައިޒޭޝަން ކޯޕަރަޓައިޒޭޝަން (ޕީސީބީން) ވަނީ މިކަން އިއުލާނުކޮށްފައެވެ. ޕީސީބީން ކުރި ޕޯސްޓެއްގައި ބުނީ ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރުގެ މަޤާމުންނާއި ބޯޑު މެންބަރުކަމުގެ މަޤާމުން ހ.ޔެލޯރޯޒް 2، މޭޖަރ (ރިޓަޔަރޑް) މުޙައްމަދު ނަޖާޙް މިއަދުން ފެށިގެން ވަނީ ވަކިކޮށްފައި ކަމަށެވެ.
ނަޖާހު އެ މަޤާމުން ވަކިކުރެއްވި ސީދާ ސަބަބެއް ސަރުކާރުން އަދި ހާމަކޮށްފައި ނުވިނަމަވެސް، ބެލެވޭގޮތުގައި، އޭނާ ވަކިކުރީ މަޤާމުގެ މަސްއޫލިއްޔަތު ރަނގަޅަށް އަދާކުރެވިފައި ނުވާތީއެވެ.
ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރުގެ މަޤާމުންނާއި ބޯޑު މެންބަރުކަމުގެ މަޤާމުން ހ.ޔެލޯރޯޒް 2، މޭޖަރ (ރިޓަޔަރޑް) މުޙައްމަދު ނަޖާޙް މިއަދުން ފެށިގެން ވަނީ ވަކިކޮށްފައެވެ.
— Privatization & Corporatization Board (@pcb_gov) April 6, 2026
ފެނަކައިގެ އެމްޑީގެ މަޤާމަގަށް ނަޖާހު އައްޔަންކުރީ ޑިސެމްބަރު 23، 2024 ގައެވެ އޭނާ އައްޔަންކުރީ ނޮވެމްބަރު 28، 2024 އިން ފެށިގެން އެ މަޤާމުގައި ހުންނެވި މުއާޒު މުހައްމަދު ރަޝީދު އެ ދުވަހު އިސްތިއުފާ ދެއްވުމުންނެވެ. މުއާޒަށް އެ ފިޔަވަޅު އެޅުއްވީ ފެނަކައިގެ ކަންކަން އިތުރަށް ރަނގަޅު ކުރެވޭނެ އަލި މަގެއް ފެންނަން ނެތުމުން ކަމަށް ވިދާޅުވެ އެވެ.
ނަޖާހު އަކީ ލޮޖިސްޓިކްސް ދާއިރާއިން މަތީ ތައުލީމު ހާސިލް ކުރައްވާފައިވާ އަދި 21 އަހަރު ވަންދެން ސިފައިންގޭގައި ޚިދުމަތް ކުރައްވައިފަވާ ފަރާތެކެވެ. އޭނާ ވަނީ ލޮޖިސްޓިކްސް މެނޭޖުމަންޓުގެ ދާއިރާ އިން މާސްޓާސް ވެސް ހައްދަވައިފަ އެވެ. އެހެންނަމަވެސް ފެނަކަ އެމްޑީއެއްގެ ގޮތުގައި މާލެ ފިޔަވައި އެންމެ އާބާދީ ބޮޑު އައްޑޫގެ ކަރަންޓުގެ މައްސަލަ ހައްލު ނުކުރެވި މި ސަރުކާރުގައި އެތައް ދުވަހެއް ވުމުން އޭނާއަށް ވަނީ ފާޑުކިޔުން ވަރަށް ބޮޑަށް އަމާޒުވެ، ރައްޔިތުންގެ އިތުބާރު ގެއްލިފައެވެ. އަދި އައްޑޫސިޓީއިން ނިމިދިޔަ ކައުންސިލް އިންތިޚާބުގައި ސަރުކާރަށް އެންމެ ގޮނޑިއެއްވެސް ކާމިޔާބު ނުވުމުގެ އެއް އަސްލަކީ އައްޑޫސިޓީގެ ޒަމާންވީ ކަރަންޓު މައްސަލަ ހައްލު ނުވުން ކަމުގައި ގިނަބަޔަކު ދެކެއެވެ.
