އިއްޔެ ކުރިއަށްދިޔަ ލޯކަލް ކައުންސިލް އިންތިޚާބު އަދި އަންހެނުންގެ ތަރައްޤީއަށް މަސައްކަތް ކުރާ ކޮމިޓީ (ޑަބްލިއުޑީސީ) ގެ އިންތިޚާބުގެ ގިނަ ގޮނޑިތައް ވެރިކަން ކުރާ ޕީއެންސީން ހޯދާފައިވާ ކަން އިލެކްޝަންސް ކޮމިޝަން (އީސީ) ގެ ވަގުތީ ނަތީޖާ އިން ވަނީ ދައްކާފައެވެ.
ވަގުތީ ނަތީޖާތައް ދައްކާ ގޮތުން މިހާތަނަށް ގުނި ވޯޓު ފޮށިތަކުގެ ތެރެއިން ޕީއެންސީން ވަނީ 450 އަށް ވުރެ ގިނަ ގޮނޑި ކާމިޔާބުކޮށްފައެވެ. ޕީއެންސީއަށް އެންމެ ގިނަ ގޮނޑިތައް ލިބުނީ ރަށު ކައުންސިލްތަކުންނެވެ. ރަށު ކައުންސިލްތަކުން ޕީއެންސީއަށް 262 ގޮނޑި ލިބުނު ކަމަށް ދައްކައެވެ. އަދި އ.ތ.މ ކޮމިޓީތަކުގެ ގޮނޑިތަކުގެ ތެރެއިން 190 ގޮނޑިއާއެކު އެންމެ ގިނަ ގޮނޑި ހޯދާފައި ވަނީ ވެސް ޕީއެންސީންނެވެ.
ރަށު ކައުންސިލްތަކާއި އ.ތ.މ ކޮމިޓީތަކުގެ ގޮނޑިތަކާ ހިލާފަށް ސިޓީ ކައުންސިލްތަކުން ޕީއެންސީއަށް ލިބުނު ގޮނޑި މަދެވެ. 5 ސިޓީ ކައުންސިލްގެ މޭޔަރުން ހިމެނޭ ހެން، ގިނަ ގޮނޑިތަކާއެކުގައި އެ ކައުންސިލްތަކުގެ މެޖޯރިޓީ ނެގީ އިދިކޮޅު އެމްޑީޕީންނެވެ.
ރަށު ކައުންސިލްތަކުގެ ގޮނޑިތަކަށް ބަލާއިރު، އެމްޑީޕީން ވަނީ 238 ގޮނޑި ހޯދައިފައެވެ. އަދި އ.ތ.މ ކޮމިޓީގެ 177 ގޮނޑިއާއެކު، އެމްޑީޕީން މިހާތަނަށް އައިއިރު، 400 އަށް ވުރެ ގިނަ ގޮނޑި ހޯދާފައިވާ ކަން ވަގުތީ ނަތީޖާ އިން ދައްކައެވެ.
As predicted, PNC won the majority. It is disappointing that we lost in some cities. However, this is not a reflection of government policy, but rather a failure in campaign execution and local team management. InshaAllah, with this experience, PNC will step up even stronger. pic.twitter.com/Ic8kdnhdew
— Zahid Rameez (@xahidcreator) April 5, 2026
ރަށު ކައުންސިލްތަކުގެ ގޮނޑިތަކުގެ ތެރެއިން 80 ގޮނޑި، އަމިއްލަ ގޮތުން ވާދަކުރެއްވި ކެންޑިޑޭޓުން ކާމިޔާބު ކުރެއްވި އިރު، 14 ގޮނޑި ވަނީ އެހެނިހެން ޕާޓީތަކުގެ ކެންޑިޑޭޓުން ކާމިޔާބުކޮށްފައެވެ.
އ.ތ.މ ކޮމެޓީގެ އިންތިޚާބުގައި އަމިއްލަ ގޮތުން ވާދަކުރެއްވި 56 ގޮނޑި ކާމިޔާބު ކުރެއްވި ކަމަށް ވަގުތީ ނަތީޖާ އިން ދައްކާއިރު، އެހެނިހެން ޕާޓީތަކުން ހަތް ގޮނޑިއެއް ކާމިޔާބު ކުރި ކަމަށް ވެސް ވަގުތީ ނަތީޖާ އިން ދައްކައެވެ.
އިންތިހާބުގެ ވަގުތީ ނަތީޖާތަކަަށް ބަލާއިރު މިހާތަނަށް ގުނި ފޮށިތަކުގެ ނަތީޖާއިން ފެންނަ ގޮތުގައި ގިނަ ރަށްރަށުގެ ކައުންސިލު ރައީސްކަން ކާމިޔާބުކުރެއްވީ ވެސް ޕީއެންސީގެ ޓިކެޓުގައި ވާދަކުރެއްވި ކެންޑިޑޭޓުންނެވެ. އަދި ވަރަށް ގިނަ ރަށްރަށުން ކައުންސިލްތަކާއި އ.ތ.މ ކޮމިޓީގެ ހުރިހާ ގޮނޑިއެއް ވެސް ނަގާފައި ހުރީ ޕީއެންސީންނެވެ.
