މާލޭ ނޯތު ހާބަރުގައި އަޅާފައި އޮތް ބޯޓެއްގައި ތިބި ބަޔަކު ޚަބަރު ހުސްވެގެން އައިޖީއެމް ހޮސްޕިޓަލުގައި ފަރުވާ ދޭން ފަށައިފިއެވެ.
މިކަމާ ގުޅިގެން މީޑިއާތަކާ ޙިއްޞާކުރި މެސެޖެއްގައި ފުލުހުން ބުނެފައިވަނީ، މާލޭ ނޯތު ހާބަރުގައި އަޅާފައި އޮތް ބޯޓެއްގައި ތިބި ބަޔަކު ޙާލު ދެރަވެ، ޚަބަރު ހުސްވެފައިވާކަމުގެ މިއަދުގެ ހެނދުނު 06:35 އެހައިކަންހާއިރު ފުލުހުންނަށް ލިބިފައިވާ ކަމަށެވެ. ޚަބަރު ހުސްވެފައިވަނިކޮށް ފެނިފައިވަނީ ހަތަރު ބިދޭސީންނާއި ދިވެއްސެކެވެ. މި އެންމެންނަކީ ވެސް ފިރިހެނުންކަމަށް ފުލުހުން ވަނީ ބުނެފައެވެ.
ފުލުހުން ބުނީ މި ފަސް މީހުންނަށް މިހާރު އައިޖީއެމް ހޮސްޕިޓަލުގައި ފަރުވާ ދެމުންދާ ކަމަށެވެ.
މި މީހުން ޚަބަރު ހުސްވާން މެދުވެރިވީ ކޮން ސަބަބަކާ ހުރެކަމެއް ފުލުހުން ވެސް އަދި އައިޖީއެމް ހޮސްޕިޓަލަކުން ވެސް ސާފުކޮށްދީފައެއް ނުވެއެވެ. ނަމަވެސް މި މައްސަލައާ ގުޅިގެން ބަލަންޖެހޭ ކަންކަން ބަލައި، އިތުރަށް ތަޙުޤީޤުކުރަމުން އަންނަކަމަށް ފުލުހުން ވަނީ އިތުރަށް ބުނެފައެވެ.
