ކުރިއަށް އޮތް ލޯކަލް ކަައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބާ ދިމާކޮށް ކޮންގްރެސް ޕާޓީން އަދި އިދިކޮޅު އެމްޑީޕީން ކުރިއަށް ގެންދިޔަ ކެމްޕެއިން ހަރަކާތްތައް ފޯރިގަދަ ހިނގާލުމަކާއެކު ނިންމާލައިފިއެވެ.
ކޮންގްރެސް ޕާޓީން މި ހިނގާލުން ފަށާފައިވަނީ މިއަދު ހަވީރު 15:45 ގައި އެ ޕާޓީގެ މައި ޖަގަަހަ ކުރިމަތި (އަރޓިފިޝަލް ބީޗު ސަރަޙައްދު ކުރިމަތި) ބޮޑުތަކުރުފާނު މަގުންނެވެ. މި ހިނގާލުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއި، އެމަނިކުފާނުގެ އަނބިކަނބަލުން ސާޖިދާ މުޙައްމަދުގެ އިތުރުން އެ ޕާޓީގެ އިސްފަރާތްތަކާއި އެ ޕާޓީއަށް ނިސްބަތްވާ އާންމު މެންބަރުން ބައިވެރިވެފައިވެއެވެ.
އެމްޑީޕީން މި ޙަރަކާތް ފަށާފައިވަނީ ލޮނު ޒިޔާރަތްޕާކު ސަރަޙައްދުން ބޮޑުތަކުރުފާނު މަގުން ގޮސް އަމީނީ މަގާއި ދިމާލުންނެވެ. ދެ ޕާޓީގެ ހިނގާލުމަށް ބަލާއިރު ބޮޑުފަޅި ގޮތުގައި ބެލެވެނީ ސަރުކާރު ހިންގާ މައިޕާޓީ ޕީއެންސީގެ ރެލީއެވެ.
ވޭތުވެދިޔަ ދުވަސްތަކުގައި ކޮންގްރެސް ޕާޓީން ވަނީ ވަރަށް ފޯރިގަދަކޮށް ކެމްޕޭނު ހަރަކާތްތައް ރާއްޖޭގެ އެކި ސަރަޙައްދުތަކުގައި ކުރިއަށް ގެންގޮސްފައެވެ. އެގޮތުން މާލޭ ސިޓީއާއި އަތޮޅުތެރޭގެ އެކި ރަށްރަށުގައި ދޮރުން ދޮރަށް ހިނގުމުގެ ހަރަކާތްތަކާއި ހަރުގެ ޖަލްސާތަކުގެ އިތުރުން ރެލީތައް ބާއްވާފައިވާކަން ފާހަގަކޮށްލެވެއެވެ.
މި އަހަރުގެ ލޯކަލް ކައުންސިލްތަކުގެ އިންތިޚާބުގައި އެކި ސަބަބުތަކާ ހުރެ، ޖުމްލަ 69 ގޮނޑިއެއް އިންތިޚާބަކާ ނުލައި ޕީއެންސީއަށް ކާމިޔާބުވެފައިވާ އިރު އޭގެ ތެރޭގައި ކައުންސިލްތަކުގެ 28 ގޮނޑިއެއްވެސް ހިމެނެއެވެ.
މި ފަހަރުގެ ލޯކަލް ކައުންސިލްތަކުގެ އިންތިޚާބުގައި ރަށު ކައުންސިލްތަކަށް 626 އަދި ސިޓީ ކައުންސިލްތަކަށް 52 ކައުންސިލަރުން އިންތިޚާބު ކުރާނެއެވެ. އެހެންކަމުން އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށްވެސް ހަމަ އެ އަދަދަށް މެންބަރުން އިންތިޚާބުކުރުމަށް ވަނީ ހަމަޖެހިފައެވެ. މި އިންތިޚާބުގައި ޖުމްލަ 2,962 ކެންޑިޑޭޓުން ވާދަކުރާނެއެވެ.
މި އަހަރުގެ ލޯކަލް ކައުންސިލްތަކުގެ އިންތިޚާބުގައި ވޯޓުލުމުގެ ޙައްޤު 294,937 މީހުންނަށް ލިބިފައިވެއެވެ. އެއީ 144,527 އަންހެނުންނާއި 150,410 ފިރިހެނުންނަށެވެ. އޭޕްރީލް މަހުގެ ހަތަރުވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބާއެކު ހަމަ އެ ދުވަހު ރިޔާސީ އިންތިޚާބާއި ރައްޔިތުންގެ މަޖިލިސް އިންތިޚާބު އެއްދުވަހެއްގައި ބޭއްވުމަށް ރައްޔިތުންގެ ޚިޔާލު ހޯދުމަށް ނަގާ ފެންނަ ނުފެންނަ ވޯޓު ނެގުންވެސް އޮންނާނެއެވެ.
