މަރަކީ ކޮންމެ އިންސާނަކާވެސް ބައްދަލުކުރާނޭ، އެއްވެސް މީހަކަށް އިންކާރު ނުކުރެވޭނޭ ބޮޑު ޙަޤީޤަތެއްކަން ހަނދާންކޮށްދީ، މަރުވާނެ ދުވަހަކަށް ނުވަތަ މަރަށް ތައްޔާރުވުމަށް މިއަދުގެ ހުކުރު ޚުތުބާގައި ގޮވާލައިފިއެވެ.
މިއަދު އިއްވި ހުކުރު ޚުތުބާގެ މައުޟޫޢު އަކީ ”މަރު“ އެވެ. މި ޚުޔުބާގައި ބުނީ މަރަކީ ކޮންމެ އިންސާނަކާ ވެސް ކުރިމަލާންޖެހޭނޭ ޙަޤީޤަތެއް ކަމަށާަ، މި ޙަޤީޤަތާ މެދު އެއްވެސް މީހަކު ޚިޔާލުތަފާތުވެފައެއް ނުވާ ކަމަށެވެ. އަދި އެމީހަކު ދުނިޔޭގައި އެއްކުރި މުދަލާއި، ލޯބިވާ އަނބިދަރީންނާއި، ގެދޮރާއި، ބިނާކޮށްފައިވާ ވިޔަފާރިއާއި، މި ދުނިޔޭގެ ޒީނަތުގައި ހޭދަކުރަމުން ދިޔަ އުފާވެރި ދުވަސްތައް ދޫކޮށް، ދުނިޔެއިން ވަކިވާން ޖެހޭ ވަގުތަކީ އާދައިގެ ވަގުތެއްނޫން ކަމަށެވެ.
ޚުޠުބާގައި ވަނީ މާތް الله ވަޙީ ބަސްފުޅަށް އަލިއަޅުއްވާލާފައެވެ.
މާތް الله ވަޙީ ކުރެއްވިއެވެ. ”އަދި މަރުގެ ސަކަރާތް ޙައްޤު ގޮތުގައި އަންނަ ހުށްޓެވެ. އެއީ ތިބާ އެޔަށް ފިލާން އުޅޭ ކަމުގައިވީ މަރެވެ.“
ޚުތުބާގައި އިތުރަށް ބުނީ މަރުން ރެކިގަނެވޭނޭ ހަމަ އެކަކު ވެސް ނުވާ ކަމަށެވެ. އެއީ ކިތަންމެ އާރާއި ބާރެއްގެ ވެރިއެއްކަމުގައި ވިޔަސް، އޭނާގެ ގާތަށް މަރު އަންނާނެ ކަމަށާ ދުނިޔޭގެ ރަސްރަސްކަލުންގެ ގަނޑުވަރުތަކުގައި އެތައް ބަޔަކު ފާރަވެރިވެ، އެ މީހުން ހިމާޔަތްކުރުމަށް ތިއްބައި އެމީހުންނާވެސް މަރު ބައްދަލުކުރަނީ ހުއްދަހޯދައިގެން ނޫން ކަމަށް ބުނެފައިވއެވެެ.
މާތް الله ވަޙީކުރައްވައިފައި ވެއެވެ. ”އުސްވެގެންވާ ގަދަފަދަ ކިއްލާތަކެއްގެ ތެރޭގައި ތިޔަބައިމީހުން ތިބިކަމުގައިވިޔަސް، ތިޔަބައިމީހުން ތިބި ކޮންމެ ތަނަކުން މަރު، ތިޔަބައިމީހުން އަތުލާނެތެވެ.“
މާތް اللهގެ އަމުރުފުޅު އައުމުން ވަގުތުން އެ މީހެއްގެ މަރުހިއްޕަވާނެ ކަމަށާ، މީހާގެ ޢުމުރަކަށް، ބަލިޙާލަތަކަށް، މީހާގެ މުއްސަނދިކަމާއި ފަޤީރުކަމަކަށް، މާތްކަމާއި މަތިވެރިކަމަކަށް މަރު ނުބަލާނެކަމަށާޢި، އެހެންކަމުން، މަރުވާނެކަމާއި، މަރާ ކުރިމަތިލާން ޖެހޭނޭކަން ދަނެ، އެ ކަމަށް ތައްޔާރުވާށް ޚުތުބާގައި ވަނީ ގޮވާލާފައެވެ. އެގޮތުން ހެޔޮ ޢަމަލުތައް ގިނަކޮށް، ނުބައި ކަންކަމުން ދުރުވެ، ގިނަގިނައިން މަރު ހަނދާންކުރާން ވަނީ އިލްތިމާސްކޮށްފައެވެ.
