ރައީސް ޑރ. މުޢިއްޒުގެ ސަރުކާރުން އިތުރު ދަރަންޏެއް ނުނަގާ ވޭތުވެދިޔަ 2 ސަރުކާރުން އުފެއްދި ”ބޮޑު ދަރަނި“ 500 މިލިއަން ޑޮލަރުގެ ސުކޫކު ދެއްކުމުން ކުރީގެ ރައީސް މުޙައްމަދު ނަޝީދުގެ ތައުރީފް ސަރުކާރަށް ބަންޑުންކޮށްލައިފިއެވެ.
ކުރީގެ ރައީސް ޔާމީންގެ ސަރުކާރުން ނަގާފައިވާ 250 މިލިޔަން ޑޮލަރުގެ ”ސަނީ ސައިޑް“ ބޮންޑު އަދާކުރުމަށް އެ އަދަދު ދެގުނަކޮށް އެމްޑީޕީ ސަރުކާރުން 2021ވަނަ އަހަރު ވިއްކި 500 މިލިޔަން އެމެރިކާ ޑޮލަރުގެ ސުކޫކު ރައީސް މުޢިއްޒުގެ ސަރުކާރުން މިވަނީ ދައްކައި މުޅިން ޚަލާސްކޮށްފައެވެ.
މި ފައިސާ ދެއްކުމުގައި ސަރުކާރުން ބޭނުންކޮށްފައިވަނީ ސޮވެރިން ޑިވެލޮޕްމަންޓް ފަންޑަށް ޖަމާކުރި ފައިސާ އާއި އަދި ދިވެހި ދަޢުލަތުގެ ރިޒާވްގައި ހުރި ފައިސާއެވެ.
މިކަމަށް ޢިޝާރާތްކުރައްވާ ނަޝީދު ކުރެއްވި ޕޯސްޓެއްގައި ވަނީ އިތުރު ދަރަނި ނުނަގާ ސުކޫކް ބޮންޑު މުޅިން އެއްކޮށް ދައްކާ ޚަލާސްކުރުމަކީ ލިބިގެންދިޔަ ވަރަށްބޮޑު ހިތްހަމަޖެހުމެއް ކަމަށާއި، އެއީ އުންމީދީ ކަމެއް ކަމަށެވެ.
It is very encouraging that the government has paid back the Sukuk bond in full without taking on further debt.👏🏽👏🏽
— Mohamed Nasheed (@MohamedNasheed) April 2, 2026
ސަރުކާރުން ބުނީ، ސުކޫކަށް ދައްކަންޖެހޭ އަސްލު އަދަދު ކަމަށްވާ 500 މިލިޔަން ޑޮލަރާއި، އޭގެ ފައިދާގެ ގޮތުގައި ދައްކަންޖެހޭ 24.68 މިލިޔަން ޑޮލަރާއެކު ޖުމްލަ 524.68 މިލިޔަން އެމެރިކާ ޑޮލަރު މިހާރު ވަނީ ދައްކައި ނިންމާފައި ކަމަށެވެ. މި ފައިސާ ދެއްކުމާއެކު ޖީޑީޕީގެ ނިސްބަތުން ދައުލަތުގެ ދަރަނީގެ މިންވަރު ކުޑަވެގެންދާނެ ކަމަށް ސަރުކާރުން ބުނެއެވެ.
މި ސަރުކާރުން ވެރިކަމާ ހަވާލުވުމަށްފަހު، ރާއްޖޭގެ އިޤުތިސާދަށް ބުރަ ނުވާނެ ގޮތަށް ދަރަނި އަދާކުރުމުގެ ހަރުދަނާ ފިޔަވަޅުތަކެއް ވަނީ އަޅަން ފަށާފައެވެ. އޭގެ ތެރޭގައި އެސްޑީއެފްއަށް ބޭރު ފައިސާ ޖަމާކުރަން ފެށުމާއި، އެއަރޕޯޓް ޑިވެލޮޕްމަންޓް ފީގެ ރޭޓަށް ގެނައި ބަދަލުތައް ހިމެނެއެވެ. މީގެ ސަބަބުން ފައިސާޗާޕު ނުކޮށް ދަޢުލަތަށް އިތުރު ބުރައަކަށްނުވެ ސުކޫކު ދެއްކުމަށް ލުއިވެގެން ދިޔައެވެ.
ސަރުކާރުގެ މި ހަރުދަނާ ސިޔާސަތުތަކުގެ ނަތީޖާއެއްގެ ގޮތުން، އެސްޑީއެފްގެ ބޭރު ފައިސާގެ ބެލެންސް ފުރަތަމަ ފަހަރަށް 350 މިލިޔަން ޑޮލަރަށްވުރެ އިތުރުވެފައިވާއިރު، ރާއްޖޭގެ ރަސްމީ ރިޒާވް ވަނީ މިއަހަރުގެ މާރިޗު މަސް ނިމުނުއިރު 1.3 ބިލިޔަން ޑޮލަރަށް އަރާފައެވެ. މިއީ ރާއްޖޭގެ ތާރީހުގައި ރަސްމީ ރިޒާވް މިހާ މަތީ މިންވަރަކަށް އިތުރުވި ފުރަތަމަ ފަހަރުކަން ފާހަގަކޮށްލެވެއެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން 2021 ވަނަ އަހަރު ސުކޫކު ނަގާފައިވަނީ އޭގެ ކުރީގެ ސަރުކާރުން ނަގާފައިވާ 250 މިލިއަން ޑޮލަރުގެ ”ސަނީ ސައިޑް“ ބޮންޑު ދެއްކުމަށްޓަކަ އެވެ. ފިނޭންސް މިނިސްޓްރީން ބުނީ އެ ސުކޫކަކީ ދަރަނި އަދާކުރާނެ އެކަށީގެންވާ ސިޔާސަތެއް ނެތި، ބޮޑު އިންޓްރެސްޓެއްގައި ނަގާފައިވާ ދަރަންޏެއް ކަމަށެވެ.
ސުކޫކު ދެއްކުމަށް ފަހު، މާލީ އިދާރާތަކާ ގުޅިގެން މާލީ އެހީތެރިކަން ހޯދުމުގެ މަސައްކަތް ކުރަމުން އަންނަ ކަމަށް ފިނޭންސް މިނިސްޓްރީން ބުނެފައިވެ އެވެ.
ކުރީގެ ސަރުކާރުތަކުން ނަގާފައިވާ ބޮޑެތި ދަރަނިތަކާ ހެދި ކުރިމަތިވި އިޤްތިސާދީ ދަތިތަކާ ގުޅިގެން ސުކޫކް ދެއްކިދާނެ ކަމާ މެދު ބައެއް ފަރާތްތަކުން ޝައްކު އުފެއްދަމުން އައި ނަމަވެސް ސަރުކާރުން އަބަދުވެސް ބުނަމުން އައީ ކަނޑައަޅާފައިވާ ތާރީހަށް ސުކޫކް ދެއްކޭނެ ކަމުގެ ޔަޤީންކަން އެބައޮތް ކަމަށެވެ.
ފިނޭންސް މިނިސްޓްރީން ބުނީ، އެ ދަރަނި އަދާކުރުމާ އެކު، ޖީޑީޕީގެ ނިސްބަތުން ދައުލަތުގެ ދަރަނި ހުރި މިންވަރު ދަށްވެ، ކުރިއަށް އޮތް މެދުރާސްތާގައި ރާއްޖޭގެ މާލީ ދާއިރާ އިތުރަށް ވަރުގަދަވާނެ ކަމަށެވެ.
