ބޮޑުތަކުރުފާނު މަގު ތަރައްޤީކުރުމުގެ މަޝްރޫޢުގެ މަސައްކަތް ހިނގަމުންދާގޮތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައްލަވާލައްވައިފިއެވެ.
ބޮޑުތަކުރުފާނު މަގު ތަރައްޤީކުރާ ސަރަޙައްދަށް ރައީސް ވަޑައިގަތުމުން އެމަނިކުފާނަށް މަރުޙަބާ ދެންނެވީ ކޮންސްޓްރަކްޝަން މިނިސްޓަރު ޑރ. ޢަބްދުﷲ މުއްޠަލިބާއި، މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީގެ މެނޭޖިންގ ޑިރެކްޓަރު ޑީސީޕީ (ރިޓަޔަރޑް) އަޙްމަދު ސަޢުދީއެވެ. އެ ސަރަޙައްދަށް ވަޑައިގެން ރައީސް ވަނީ މަސައްކަތްތައް ކުރިއަށް ގޮސްފައިވާ މިންވަރު ވަޒަންކުރައްވައިފައެވެ.
ބޮޑުތަކުރުފާނު މަގުގައި ތާރުއަޅައިގެން ޒަމާނީ ފެންވަރަކަށް ތަރައްޤީކުރަނީ ފަޅުތެރެއިން ބައެއް ހިއްކައިގެން، ހަތަރު ލޭނަށްވާ ގޮތަށް މަގު ފުޅާކޮށް ތާރު އަޅައިގެންނެވެ. އެގޮތުން މި މަޝްރޫޢުގެ ފުރަތަމަ ސެގްމަންޓާއި ދެވަނަ ސެގްމަންޓްގެ މަސައްކަތް މިހާރު ނިމިފައިވާއިރު މިހާރު ކުރިއަށް ދަނީ ހެންވޭރު ފެރީ ޓަރމިނަލުން ފެށިގެން ޖުމްހޫރީ މައިދާނާއި ހަމައަށް މަގު ފުޅާކޮށް ތަރައްޤީކުރުމުގެ މަސައްކަތެވެ.
ބޮޑުތަކުރުފާނު މަގު ތަރައްޤީކުރުމުގެ ޢަމަލީ މަސައްކަތް ފަށާފައިވަނީ މިދިޔަ 2025 ވަނަ އަހަރުގެ އޭޕްރީލް މަހުގެ ތެރޭގައި ފެށި މި މަޝްރޫޢު އެމްޓީސީސީއާ ޙަވާލުކޮށްފައިވަނީ 144 މިލިއަން ރުފިޔާއަށެވެ. މި މަޝްރޫޢުގެ ދަށުން ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް ޖުމްލަ 1،088 މީޓަރުގެ ސަރަޙައްދެއްގައި ތާރުއަޅައިގެން ތަރައްޤީކުރުމަށް ވަނީ ހަމަޖެހިފައެވެ.
