ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި ތަރައްޤީކޮށްފައިވާ އަމާން އުދަރެސް އަދި އަމާން ދޯދި ފުލެޓްތަކުގެ ކުލި ކުޑަކޮށްދިނުމަށް ފަހި ޔޫނިއަނުން (ފުލެޓްތަކުގެ ވެރިން) ގޮވަން ފަށައިފިއެވެ.
ފަހި ޔޫނިއަނުން ވަނީ ފުލެޓްތަކުގެ ކުލި ކުޑަކޮށްދިނުމަށާއި ކުލި ނެގުން ފަސްކޮށްދިނުމަށް އެދި ބަޔާނެއް ނެރެފައެވެ. އެ ޔޫނިއަނުން ބުނީ، ފަހި ފުލެޓްތަކުގެ ކުއްޔަށް ކުރީ ސަރުކާރުން ކަނޑައަޅާފައިވަނީ، ދެ ކޮޓަރީގެ އެޕަރޓްމަންޓެއް ނަމަ 6،000 ރުފިޔާ އަދި ތިން ކޮޓަރީގެ އެޕަރޓްމަންޓެއް ނަމަ 8،000 ރުފިޔާ (މެއިންޓަނަންސް ފީއާއިއެކު) ކަމަށެވެ.
ނަމަވެސް ސަރުކާރު ފަހި ފުލެޓުގެ ކުއްޔަށް ގެނައި ބަދަލުތަކުގެ ސަބަބުން ދެ ކޮޓަރީގެ އެޕަރޓްމަންޓެއްގެ ކުއްޔަކީ 7،000 ރުފިޔާ އަދި ތިން ކޮޓަރީގެ އެޕަރޓްމަންޓެއްގެ ކުއްޔަކީ 10،000 ރުފިޔާ ކަމަށް ފަހި ޔޫނިއަނުން ވަނީ ބުނެފައެވެ. ކުލީގެ އަގުތައް ބޮޑުކަމަށް ބުނެ ފަހި ޔޫނިއަނުން ވަނީ ފުލެޓްތަކުގެ ކުލި އެންމެ ކުރީގެ ކުއްޔަށް ބަދަލުކޮށްދިނުމަށާއި، ފްލެޓުތަކުގެ ޑައުންޕޭމަންޓު އުނިކޮށްދިނުމަށް ގޮވައި މަގުމަތީގައި އަޑުގަދަ ވެސް ކޮށްފައެވެ.
ފަހި ޔޫނިއަނުން ވަނީ ސަރުކާރަށް އިތުރު ޑިމާންޑްތަކެއް ވެސް ކޮށްފައެވެ. އެގޮތުން:
- ދުނިޔެ އަށް މިހާރު ކުރިމަތިިވެފައިވާ ދަތި ޙާލަތަށް ރިޢާޔަތްކޮށް، ފުލެޓަށް ބަދަލުވުމަށް ބޮޑު ހޭދައެއް ކުރަން ޖެހޭތީ މިހާރު ދީފައިވާ ތިން މަސް ދުވަހުގެ ގްރޭސް ޕީރިއަޑް ހަ މަސް ދުވަހަށް ނުވަތަ އެއް އަހަރަށް ދަންމައިލުން
- ފަހި ފުލެޓުތަކުގެ އެއްބަސްވުން ’ގަނެވިއްކުމުގެ‘ އެއްބަސްވުމަކަށް ބަދަލުކޮށްދިނުން
ސޯޝަލް ހައުސިންގ މަޝްރޫޢުގެ ދަށުން ހުޅުމާލޭގައި ތަރައްޤީކޮށްފައިވާ ހިޔާ ފުލެޓުތަކުގެ އެއްބަސްވުމުގައި ސޮއިކުރާ ދުވަހުން ފެށިގެން އެއީ އެ މީހެއްގެ އަމިއްލަ މިލްކަކަށް ހިޔާ ފުލެޓުތައް ބަދަލުވެފައިވާ ކަމަށާއި، އަދި ތަންތަނުގެ ކުލި ދެއްކުން ވެސް ކޮވިޑާ ގުޅިގެން އެއް އަހަރުދުވަހަށް ފަސްކޮށްދީފައިވާކަމަށް ފަހި ޔޫނިއަނުން ވަނީ ބުނެފައެވެ. މީގެ އިތުރުން ހިޔާ ފުލެޓްތަކުގެ ކުލި ކުޑަކުރި ފަދައިން ފަހި ފުލެޓްތަކުގެ ކުލި ކުޑަކުރުމަށް ސަރުކާރަށް ގޮވާލާކަމަށް އެ ޔޫނިއަނުން ބުނެފައިވެއެވެ.
ފަހި ފުލެޓްތަކުގެ ކުލި ކުޑަކޮށް ޑައުންޕޭމަންޓް ކަނޑާލުމަށް ފަހި ޔޫނިއަނުން ގޮވާލާފައިވާއިރު، ފާހަގަކޮށްލަންޖެހޭ ކަމަކީ މި ސަރުކާރުން ވަނީ އެ ފުލެޓްތަކުގެ ވެރިންގެ އެދުމުގެ މަތިން މީގެ ކުރިން ވެސް އެ ފުލެޓުގެ ކުލި ކުޑަކޮށްދީފައެވެ.
