މާލޭ ސަރަޙައްދަށް ދިމާވެފައިވާ މައްސަލަތައް ޙައްލުކުރެވޭނީ ސަރުކާރަށް އެއްބާރުލުންދޭނެ ކައުންސިލެއް ހޮވައިގެން ކަމަށް ކޮންގްރެސް ޕާޓީގެ ފަރާތުން މާލޭ ސިޓީގެ މޭޔަރުކަމަށް ވާދަކުރައްވާ ކެންޑިޑޭޓް މޫސާ ޢަލީ ޖަލީލް ވިދާޅުވެއްޖެއެވެ.
މޫސާ ޢަލީ ޖަލީލް މި މޭރުމުން ވިދާޅުވީ، ކޮންގްރެސް ޕާޓީން އާރޓިފިޝަލް ބީޗު ސަރަޙައްދުގައި ރޭ ކުރިއަށްގެންދިޔަ ހަރުގެ ޖަލްސާގައި ވާހަކަދައްކަވަމުންނެވެ. އޭނާ ވިދާޅުވީ، ފާއިތުވި ދެތިން އަހަރެއްހައި ދުވަހުގެ ތެރޭގައި މާލޭ ސިޓީގެ ތަރައްޤީއަށް ސަރުކާރުން ފަށާފައިވާ އެތައް މަޝްރޫޢަކަށް ސިޓީ ކައުންސިލުން އެއްބާރުލުން ނުދިނުމުގެ ސަބަބުން، އެކަމުގެ ހުރިހާ ދަތިތަކެއް އާންމު ރައްޔިތުންނަށް ކުރިމަތިވެފައިވާ ކަމަށެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭ ސިޓީގެ މޭޔަރަކަށް ހުންނެވި ދުވަސްވަރު އެކުލަވާލި ސްޓްރެޖިކް އެކްޝަން ޕްލޭން ނުވަތަ އެސްއޯޕީ އަކީ ރައްޔިތުން އެންމެ ބޮޑަށް ބޭނުންވާ ކަންކަން ހިމަނައިގެން ތައްޔާރުކޮށްފައިވާ ޕްލޭނެއްކަން ފާހަގަކުރައްވަމުން ޖަލީލް ވިދާޅުވީ، އެ ޕްލޭންގެ އެންމެ ކުރީގައި އޮތީ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމުގެ ވާހަކަތައް ކަމަށެވެ.
”މާލޭ ސިޓީގެ އެތައް ރައްޔިތުންނަކާ ގުޅިފައިވާ އެންމެ އަސާސީ ޙައްޤަކީ ބޯހިޔާވަހިކަން. މިއީ ޢިއްޒަތްތެރި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލޭގެ މޭރަކަށް ވަޑައިގެން އެކުލަވާލެއްވި ސްޓްރެޖެޓިކް އެކްޝަން ޕްލޭންގައި ނަންބަރު އެކެއްގައި އޮތް ޚިދުމަތް، – މޫސާ ޢަލީ ޖަލީލް ވިދާޅުވިއެވެ.
ރަސްމާލެ ހިއްކުމުގެ ބިޔަ މަޝްރޫޢާއެކު މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެކަމަށް މޫސާ ޢަލީ ޖަލީލް ވަނީ ވިދާޅުވެފައެވެ. ޖަލީލް ވިދާޅުވީ، މާލޭ ސިޓީގެ ކުދިކުދި ތަންތަނުގައި އެތަކެއް ބަޔަކު ދިރިއުޅޭ ކަމަށާއި، އެފަދަ ފަރާތްތަކަށް ތަނަވަސް ގޮތްތަކެއް ހޯދައިދިނުމަށް ސަރުކާރާއި ގުޅިގެން މަސައްކަތްތައް ކުރައްވާނެ ކަމަށެވެ.
މާލޭ ސިޓީ ކައުންސިލާއި މާލޭ ސިޓީގެ މޭޔަރަކީ އަމިއްލަ މަންފާއާއި ފައިދާއަށްވުރެ ބޮޑަށް ރައްޔިތުންގެ އިޙްސާސްތައް ދަންނަންޖެހޭ ބަޔަކަށްވާންޖެހޭ ކަމަށާއި، އޭނާގެ މޭޔަރުކަމުގައި ސަރުކާރާއި ގުޅިގެން ރައްޔިތުންނަށް ދިމާވެފައިވާ އެކި މައްސަލަތައް ވަކިން ޚާއްޞަކޮށް ބޯހިޔާވަހިކަމަށް ދިމާވެފައިވާ މައްސަލައާއި މާލޭ ސިޓީގެ މަގުތަކަށް ދިމާވެފައިވާ މައްސަލަ ޙައްލުކޮށްދެއްވުމަށް މަސައްކަތް ކުރައްވާނެކަމުގެ ޔަޤީންކަން ދެއްވާ ކަމަށް ޖަލީލް ވަނީ ވިދާޅުވެފައެވެ.
