ރާއްޖެ ޓްރާންސްޕޯރޓް ލިންކް (އާރްޓީއެލް) ފެރީގެ ޚިދުމަތް ލ. އަތޮޅުގައި ފަށައިފިއެވެ.
ލ. އަތޮޅުގައި އާރްޓީއެލް ފެރީގެ ޚިދުމަތް ފައްޓަވައިދެއްވީ އެ އަތޮޅު ފޮނަދޫގައި އެކަމަށް ޓަކައި އިއްޔެ ބޭއްވި ޚާއްޞަ ރަސްމިއްޔާތުގައި ޓޫރިޒަމް މިނިސްޓަރު ތޯރިގު އިބްރާހީމްއެވެ. މި ރަސްމިއްޔާތުގައި އެމްޓީސީސީގެ ޗެއަރމަން މުޙައްމަދު އަފީފް ޙުސައިނާއި، އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރު މުޙައްމަދު ޖަމްޝީދުގެ އިތުރުން އެމްޓީސީސީގެ އިސް ބޭފުޅުން ބައިވެރިވެވަޑައިގެންފައިވެއެވެ.
ޖުމުލަ ދެ ރޫޓަކަށް ބަހާލައިގެން ލ. އަތޮޅުގައި އާރްޓީއެލް ފެރީގެ ޚިދުމަތް ދިނުމަށް ހަމަޖެހިފައިވާއިރު، މިއަދުން ފެށިގެން މި މަހުގެ ހަތްވަނަ ދުވަހާއި ހަމައަށް ލ. އަތޮޅުގެ ރަށްތަކަށް އާރްޓީއެލް ފެރީގައި ހިލޭ ދަތުރުކުރެވޭނެ ކަމަށް އެމްޓީސީސީން ވަނީ ބުނެފައެވެ. އެމްޓީސީސީން ބުނީ އާރްޓީއެލް ފެރީގެ ދަތުރުތަކަށް އަގު ނަގަން ފެށި ނަމަވެސް، ހެޔޮ އަގުގައި ޓިކެޓު ލިބޭނެ ކަމަށެވެ.
ލ. އަތޮޅުގައި އާރްޓީއެލް ފެރީގެ ޚިދުމަތް ދިނުމަށް ބޭނުންކުރާނީ 48 މީހުންގެ ޖާގައިގެ ޒަމާނީ ދެ ލޯންޗެވެ. މި ލޯންޗުތަކުގެ ހަތަރު ޖާގަ ޚާއްޞަކޮށްފައިވަނީ، ޚާއްޞަ އެހީއަށް ބޭނުންވާ ފަރާތްތަކަށެވެ. އެމްޓީސީސީން ބުނީ ހުކުރު ދުވަސް ފިޔަވައި ކޮންމެ ދުވަހަކު އާރްޓީއެލް ފެރީގެ ޚިދުމަތް ދިނުމަށް ނިންމާފައިވާ ކަމަށެވެ.
މި މަޝްރޫއަކީ ރާއްޖޭގެ ދަތުރުފަތުރުގެ ނިޒާމު މިހާރަށްވުރެ ބޮޑަށް ހަރުދަނާކުރުމުގެ ގޮތުން ސަރުކާރުން ކުރިއަށްގެންދާ މަޝްރޫއެކެވެ.
