ސްވިފްޓުން ބޭންކް އޮފް މޯލްޑިވްސް (ބީއެމްއެލް) ސަސްޕެންޑްކޮށްފައިވާ ކަމަށް ބުނެ މީސް މީޑިއާގައި ފަތުރަމުންދާ ވާހަކަތަކަކީ އެއްވެސް ޙަޤީޤަތެއް ނެތް ދޮގު ވާހަކަތަކެއްކަމަށް އެ ބޭންކުގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.
ޝަރީފް މި މެރުމުން ވިދާޅުވީ، ސަރުކާރުގެ ”ބޯހިޔާވަހިކަން އެންމެނަށް“ ސިޔާސަތުގެ ދަށުން ބީއެމްއެލްގެ ސަބްސިޑަރީ ކުންފުނި، ބީއެމްއެލް އެފޯރޑަބަލް ލީޒިންގ ޕްރައިވެޓް ލިމިޓެޑާ ޙަވާލުކޮށްގެން ހުޅުމާލޭ ފުރަތަމަ ފިޔަވަހީގައި ތަރައްޤީކުރާ 364 ހައުސިންގ ޔުނިޓްގެ ޢަމަލީ މަސައްކަތް ފެށުމަށް ރޭ ހުޅުމާލޭގައި ބޭއްވި ރަސްމިއްޔާތުގައި ވާހަކަދައްކަވަމުންނެވެ.
ސްވިފްޓުން ބީއެމްއެލް ސަސްޕެންޑްކޮށްފައިވާ ކަމަށާއި، އެކަމުގެ ސަބަބުން ޓީޓީ ފަދަ ކްރޮސްބޯޑަރ ޕޭމަންޓްތައް ނުހެދޭ ކަމަށް ބުނެ މީސް މީޑިއާގައި ކާކުކަން ނޭނގޭ ގޮތަށް ހިންގަމުން އަންނަ އައިޑީތަކުން، އަންނަނީ އެ ބޭންކާ ގުޅޭގޮތުން ދޮގު ވާހަކަތަކެއް ފަތުރަމުންނެވެ.
ކާކުކަން ނޭނގޭ ގޮތަށް ހިންގަމުން އަންނަ އެފަދަ އައިޑީތަކުން ފަތުރަމުންދާ ވާހަކަތައް ދޮގު ކުރައްވަމުން ޝަރީފް ވިދާޅުވީ، ބީއެމްއެލްއާ ގުޅޭ މަޢުލޫމާތުތައް ރައްޔިތުންނާއި ހަމައަށް ފޯރުކޮށްދޭނީ، ސީދާ އެ ބޭންކުން ނުވަތަ މަރުކަޒީ ބޭންކު އެމްއެމްއޭއިން އެކަނި ކަމަށެވެ. އެހެންކަމުން ކާކުކަން ނޭނގޭ ގޮތަށް މީސް މީޑިއާގައި ފަތުރާ ދޮގު ވާހަކަތަކަށް ހުރިހާ ފަރާތްތަކުން ވެސް ސަމާލުވުމަށް އިލްތިމާސްކުރައްވާކަމަށް ޝަރީފް ވަނީ ވިދާޅުވެފައެވެ.
”މިކަމާ ގުޅިގެން އަޅުގަނޑު ދަންނަވާލަން އޮތީ މިއީ އެއްވެސް ޙަޤީޤަތެއް ނެތް ދޮގު ވާހަކަތަކެކޭ. ސްވިފްޓުން ސަސްޕެންޑެއްވެސް ނުކުރޭ، ބޭންކުގައި ބޭރު ފައިސާގެ ލިކިއުޑިޓީ ހުންނަންޖެހޭ ވަރަށް އެބަހުރި،“ – ޝަރީފް ވިދާޅުވިއެވެ.
ޝަރީފް އިތުރަށް ވިދާޅުވީ، ދުނިޔެ މިއަދު ކުރިމަތިލާންޖެހިފައިވާ މި ހައްސާސް ދަނޑިވަޅުގައި މިފަދަ ދޮގު ވާހަކަތައް ފެތުރުމުގެ ބޭނުމަކީ ބޭންކުގެ ޕާޓްނަރުންނާއި ކަސްޓަމަރުންގެ މެދުގައި ނުބައި ތަސައްވުރެއް އުފައްދައި، ރާއްޖޭގެ ބޭންކިންގ ނިޒާމާއި އިޤްތިޞާދަށް ގެއްލުން ދިނުން ކަމަށެވެ.
