ބައިޑަން-ޓްރަމްޕްގެ ވެރިކަން ބަދަލުވުމުގެ މަރުޙަލާގައި ނެގުނު ކަތިފިޔަވަޅެއްގެ ސަބަބުން، އެމެރިކާ މިވަނީ ޖިއޯޕޮލިޓިކަލް މަޅިއެއްގައި ތާށިވެފައެވެ. އެމެރިކާއިން އުންމީދު ކޮށްގެން އޮތީ، މީގެކުރިން ޢިރާޤާއި ސޫރިޔާގައި ޤާއިމްކުރި އިސްލާމިކް ސްޓޭޓާ ދެކޮޅަށް އެޤައުމާއި އެކު 80 ޤައުމަކުން ބައިނަލްއަޤުވާމީ ކޯލިޝަނެއް ހަދައި އެއްބާރުލުން ދިންގޮތަށް، ޔޫރަޕާއި ޢަރަބި ޤައުމުތަކުގެ އެކުވެރީން އީރާނާ ދެކޮޅަށްވެސް އެޤައުމަށް އެއްބާރުލުން ދޭނެކަމަށެވެ. އެހެންނަމަވެސް މިފަހަރު އެމެރިކާއަށް ކުރިމަތިލާން ޖެހިފައިވަނީ ހިތްދަތި ހަޤީޤަތަކާއެވެ. އެއީ އީރާނާއި ދުޝްމިނު ވުމުގައި އެމެރިކާ އެކަހެރިވެ، ޔޫރަޕާއި ޢަރަބި ޤައުމުތަކުގެ ބައިވެރިން ވޮޝިންޓަނުގެ ހަރުކަށި ސިޔާސަތާ ދުރަށް ޖެހުމެވެ.
އެމެރިކާގެ އެތެރޭގެ ސާވޭތަކުން ދައްކާގޮތުގައި، މި ހަނގުރާމައަށް އޮތް ތާޢީދު ވަނީ ތާރީޚީ މިންވަރަކަށް ދަށްވެފައެވެ. އެމެރިކާގެ ޓެކްސް ދައްކާ މީހުންނަށް ތެލުގެ އަގުބޮޑުވުމުގެ ތަކުލީފު އުފުލަން ޖެހިފައިވާއިރު، މެދުއިރުމަތީގެ މި ”ނިމުމެއް ނެތް“ ހަނގުރާމައިގެ މަޤްޞަދާއި މެދު ޢާންމުން ދަނީ ސުވާލު އުފައްދަމުންނެވެ. އީރާނުން ދޫނުދީ ހިފަހައްޓަމުންދާ ދިއުމަކީ ގިނަ ބަޔަކު ”ބަދަވުމެއް ނެތް ގޮތްދޫނުކުރުމެއް“ ކަމަށް ބެލި ނަމަވެސް، އަނެއް ބަޔަކު ދެކޭގޮތުގައި އެއީ އިސްތިރާތީޖީ ގޮތުން ދައްކާ ހިތްވަރެކެވެ. މީގެ ސަބަބުން، ބިރުދައްކައިގެން ކަންކަން ހާސިލުނުކުރެވޭނެކަން އެމެރިކާގެ ސަރުކާރަށް މިހާރު ދަނީ ވިސްނެމުންނެވެ. މަންދޫބުން މެދުވެރިކޮށް މިހާރު ދެވޭ ”މެސެޖުތަކުން“ ދޭހަވަނީ، އެޤައުމުގެ ބައިވެރިންނާއި އާންމުންގެ ކެތްތެރިކަން ކޮޅުންލާފައިވާ މި ދަނޑިވަޅުގައި، ދުނިޔޭގެ ބާރުގެ ގޮތުގައި އޮވެ އަބުރު ސަލާމަތްކުރެވޭނެ ފަދަ ގޮތަކަށް މިކަމުން ބޭރުވާނެ މަގެއް އެމެރިކާއިން ހޯދަން އުޅޭ ކަމެވެ.
